Dimapur, September 26 (TYO): NSCN (IM)-i Dimapur nung aliba shishilembartem aser dokantem nem ‘Trade license’ agütsüba inyakyim kukua aitsür ta ACAUT Nagaland-i sangdong ka nung metetdaktsü.
Dimapur nung District Administration kübok DMC-i trade license agütsür, anungji NSCN (IM)-i trade license agütsütsü nüngdak madoker aser iba ya temenünütsüka lir. Iba inyakyim ya nisung shingaia magizüktsüla, ta ACAUT Nagaland-i sangdong nung shia lir.
Saru onsara saruba indang khuret lia ano trade license agütsüba mapa tenzükba ya nübortem anema lir, kechiyong tanga Naga yimten teloktemia kasa mapaji inyaktsü tenzükra public atema khuret ulura akümtsü ta ACAUT-isa ashi.
Iba onük ya District administration kübok DMC-i rongdak süa reprangtsüla aser mazüoktettsüsa küma maodang anendaktsütsü mepishir. Trade license agütsütsü asoshi tashi alir ka dang alitsüla aser NSCN(IM)-i trade licence agütsüba ajanga district administration tashi ajembangtsür. Iba inyakyim manendaktsüra state sorkar aser Naga yimten teloktem trade license nungi sarutetba sen lemdanga agitsüsa mapang ka arutsü, ta ACAUT-isa ashi.
Ano, GPRN/NSCN-i Medical Colony, Dimapur nung GB aser council züngsemtem amokmerenba mapa magizüker, ta ACAUT-isa metetdaktsü.
October 31, 2013 nü “Sorkar Ka Saru Ka” ta nübortemi telemtetba agiba nung ajemdaker parnoki saru magütsür. Naga yimten teloktemi nübortemi mepishiba agizüktsü melena ain adokdaktsütsüsa mapa meinyaktsü metetdaktsür, ta sangdong nungsa shia lir.
ACAUT Nagaland-isa sangdong nung NSCN-R züngsem ana Dimapur nung tashiyim agi sen sarudang apuba atema Dimapur police nem tenüngsang agütsüba shisema lir.
Dimapur kümzüka ayutsü aser yimjung bener arutsü aser ano nübortemi tamang akatsü atema Dimapur police-i maneni meranga inyaktsü ajungshir, ta ACAUT-isa metetdaktsü.
You must be logged in to post a comment Login