NSCN(K) Finance Secretary, L Tuccu dena züngsem 3 kahset

Dimapur, November 2 (TYO): November 2, 2015 anepdang Zunheboto district nung security forces-i Nagaland nung NSCN(K) züngsem asem kahsetogo, ta Assam Rifles (AR) sangdong ka nung metetdaktsü.
Sepaitemi kahseter rongnung NSCN(K) Finance Secretary, L Tuccu dena liasü ta jangjaogo, ta sangdong nungsa shia lir.
Tesüiba anogo ishika Indo-Myanmar arrtsülen NSCN(K) telok aika senzüsenbongba osang angazük. Item telok yagi Security Forces amaktsü atema bomb, rocket aser prangpong-injangtem bener liasü ta osang angazük.
Item telok rongnung ka Hoshepu yimtsüng, Zunheboto district nung lir ta osang tejangja ka angazükba sülen Security Forces-i parnok mittsü atema apuso. Tanep 5:15 ako meta iba tesem nung Tata Sumo gari ka senzüba rüshi aser sepaitemi gariji mita reprangtsü atema anendaktsüdang, gari nung mena alirtemi injang kahloktsü. Iba jagi sepaitemi injang yok aser parnok kahtepdang NSCN(K) züngsem asem kahset aser Over Ground Worker ka apu, ta AR sangdong nungsa metetdaktsü.
Sepaitemi gari mita reprangdang AK-47 assault rifle ka den magazine, injang tapu balala, radio sets, military grade pouches nungertem angu.
Sepaitemi apuba Over Ground Worker dang asüngdangya asüdang Finance Secretary L Tuccu’er Farm House indang osang angazük aser ibaji mita aodang ano Over Ground Worker ka den 12 Bore Rifle ka aser injangtem angu, ta AR-isa ashi.
Iba Farm House nung Assamese nunger mapa inyaker ka kümzük. Iba nisung ya February 2015 nung L Tuccu-i truck kibur ka dang nungi tashiyim agi pur aoba liasü, ta sangdong nungsa shia lir.
Finance Secretary L Tuccu ya NSCN(K) nung lennir tejen ka liasü aser Nagaland nung senotsü dak sendakba mapa ajak pai ketdangsüa liasü. L Tuccu kahsetba ajanga NSCN(K) pur Nagaland aser Myanmar nung mapa inyaksangshi nung timtem ajurutsü.
Myanmar nungi Nagaland-i aruba NSCN(K) teloktem rongnung tanü telok ka samatsüogo aser ano parnok aika Tuensang, Mon, Zunheboto, Kiphire, Phek, Kohima aser Dimapur district tem nung mapa inyaker.
Item teloki Nagaland nung tensa raksatsütsü atema Improvised Explosive Devices, rocket launchers aser assault rifles nungertem bena lir. Parnok den külemi Manipur aser Assam nungi UNLF aser ULFA(I) teloktemia Nagaland nung NSCN(K) den mapa inyaker.
Nagaland nung yimjung aser tesünep alitsü atema, aser talisa benjungbentsü mapang tensa meraksatsü atema Civil Society Organisations aser public-i temulung melemi bilemba nisungtem senzüsenbongba osang tekaratiba nung Police Station mesüra Assam Rifle unit nem sangoktsütsü mepishir, ta Assam Rifles-isa sangdong nung metetdaktsü.