NSCN(K)-i yimjung olemtep atema telemtetba magi

New Delhi, September 3 (Agencies): India sorkar aser NSCN-IM tsüngda tenangzüktep agiba ajanga Naga yimten tebilemtsü onük metembangtettsü ta nisungtemi jembiba mapang, NSCN-K-i yimjung olemtep nung adentsü atema telemtetba kecha magii lir ta metetdaktsüogo.
Myanmar nungi NSCN-K tanishir kati osangbener den jembidang ashiba agi, “onok den nisung aser telok balalai phone ajanga yimjung olemtep nung adentsü atema ashir. Onok medenra tatembang telemtetba ka magitettsü ta ashir, saka onoki tang tashi nungbo yimjung olemtep nung adentsü atema telemtetba kecha magi lir.”
NSCN-K-i India sorkar den küm 14 tashi ceasefire nung liyonga aruba sülen March 27, 2015 nü parnoki ceasefire agienba osang metetdaktsü.
Naga yimtem tebilemtsü atema telemtetba ka agitsüba nung NSCN-K dena tanga Naga yimten telok ajak adentsüla ta Naga social activist temi ashir.
Naga Mothers’ Association, Naga Hoho aser Eastern Nagaland Peoples’ Organisation (ENPO) dena Naga nunger telok aikati NSCN-K dang yimjung olemtep nung maneni denang ta mepishia arur.