NSCN(K) noktangba aser senpet agütsütsü lemtetba magizüker : NSF

Kohima, September 18 (TYO) : India sorkari NSCN (K) küm pungu ozüngi memelaba telok ka noktangba aser NSCN (K) lennir ana atema sen lakh 17 senpet agütsütsü telemtetba agiba atema nemjema bilemer, ta Naga Students’ Federation (NSF)-i metetdaktsü.
“Iba ya Naga nunger taginüba anema lir” ta Hokolbarnü NSF tir Subenthung Kithan aser tongti tezülur Boveio Poukai Duo nati Angh PB Acharya nem tezüluba ka agütsüba nung shia lir.
“Pei sasa yimten telemtetba agia liyonga aotsü atema inyakertem anema India sorkari ibala telemtetba magitsüla. India-i linük nung yimjung aser azükaru lidaktsütsü atema nendaka bilemer süra item telemtetba agientsüla. Iba ya Naga nunger aser meimchirtemi aginüba anema lir” ta NSF-i agütsüba tezüluba nung shia lir.
Naga nunger tongti mulungtet teloktemi ceasefire maneni alitsü atema mapa inyakba mapang ka nung aser Naga nungertemi yimjung aginüba mapang ka nung India sorkari kecha mebilemdangi dang telemtetbatem agiba mangateter, ta NSF-isa ashi.
Naga nunger aser mulungtet teloktemi khen atema yimjung bener arua aliba mapang ka nung tawa India sorkari telemtetba agiba ajanga tensa raksatsü aser talisa India o NSCN (K) na tsüngda aser Naga nunger tsüngda temulung melemtep adoktsü, ta parnokisa metetdaktsü.
“August 3 nü New Delhi nung ‘Framework Agreement’ nangzüktepba sülen Naga nungertemi teti atema telemtetba ka agitsü ta imla aliba mapang ka nung India sorkari kechiba item mapa inyaka onoki metetnür. Tensa tamajungba küma maodang tawa agiba telemtetba ana meyipa agitsü atema Angh-i India sorkar den jembiang” ta NSF-i Angh dang mepishia metetdaktsü.
“Nai teti atema yimjung bener arutsüsa inyakbaji Naga nunger ajaki pelashishia agizüktsü aser kodanga mamatsü,” ta NSF-isa Angh dang ashi.
NSF nungi züngsem pungu agi akümba telok kati Angh Acharya den ajurutepa iba onük jembidang, July 23, 2015 nü Wuzu nung nisung tepsetba atema takhangba agütsüba nenshia metetdaktsü.
Tezüluba nung takhangba agütsür joko ita ana süiaka telangzüba kecha manguba atema NSF-i mepelaba olen Angh dang ashi.
Loktiyimten tangatetba nung inyakba magizükra lungkak aitba sentong agitsü, ta NSF-isa Angh dang ashi.