NSCN(K) nungi CF agienba sorkari reprangshitsüla: Congress

Kohima, September 24 (TYO): Tanü Nagaland Pradesh Congress Committee (NPCC)-i India sorkar aser state sorkar naprongla dang NSCN(K) nungi ceasefire agienba reprangshitsü mepishiogo.
Iba temepishiba ya tanü Congress Bhavan nung Northeast nung AICC general secretary in-charge, V Narayanasamy aser AICC secretary in-charge Nagaland, Jayakumar den ACCC aser DCC Tirtem den NPCC Executive Committee senden amenba mapang pangzüng pezü yangluba nung densema lir.
State Congress-isa “2015 küm NPCC asalendong nung senso ajunga nem ochi obendang/temeten, loktiliba, rongsenkettsüng aser yimtenren nung kasa maongka agütsüba den külemi pei tebilemba sadoka jembitsü temeten aser tamangba yimsü nung ajak nem jenjang aser maongka kasa agütsütsü,” ta pangzünga ayu.
Congress-isa ajaki Party sabang nung dena tarutsü yangerba nung shilem agiba ajanga electoral roll, election aser state sorkar temerük asütsü atema temalen agüja aliba nükjidongtem tongtettsü atema nüburtem ayongzüktsü lemteta ayu.
BJP-i tamangba yimsü dak sentakba nung mapatongtem benokba atema tebilemtsü kaa Congress-i secular pusemer nübur ajak ayonga sobaliba aser tamangba yimsü nung tetsükdaktsü malitsü atema longjemer inyaktsü lemtetogo.