NSCN(K) telungpurtemi Assam nung apu poksatsütsü aliba putet

Guwahati, September 15 (Agencies):NSCN-K telungpurtemi Assam, Silchar jila aser Dima Hasao district na den Manipur nung Imphal den sendaktepba apu ka  Assam, Barak Valley  nung poksatsütsü tasa yanglur aliba putet, ta police-i ashi. Iba dak sendakba nung nisung pezü pua lir.

Iba sentong tamajung atonger rongnungi National Socialist Council of Nagaland-Khaplang (NSCN-K) züngsem anabo mepushi saka Sadarghat apu poksatsütsü asoshi tapoktsütembo police aser Assam Rifles temi nguteta lir, ta Cachar Superintendent of Police, Rajveer-i metetdaktsüogo.

Police aser Assam Rifles temi mita aodang iba asameyang nung teyuariteper Assam nunger pezü puogo, ta police ketdangseri ashi.

Sepaitemi improvised explosive device (IED) ka den gelatin stick 60 nguteta lir.

Paisa ashiba agi, “Osang tejangja angashiba sülen Mongolbar anepdang police aser Assam Rifles tem Silchar nung Sonai tesemlen lemsar mita oa liasü”.

Iba mapang nisung pezü apuba den tapoktsütem nguteta liasü. Par pezü dang asüngdangya asüdang, NSCN-K puri Sadarghat apu poksatsütsü tasa asaba nung onoki yarirba lir, ta ashiba Rajveer-isa ashi.

NSCN-K telungpur anaji ammang asübayong jena otet, ta paisa shisem.

Tang nisung pezü pua alirtemji Ataur Rahman Laskar, Afzal Hussain Laskar, Azmal Hussain Laskar aser Maskar Ali Laskar nunger lir.