NSCW-i ayonga Human Traficking legal awareness kaogo

Dimapur, May 04 (Agencies): Nagaland State Commission for Women (NSCW) aser National Commission for Women (NCW), New Delhi na senteper May 03, 2017 nü Zunheboto Town Hall nung ‘Human Trafficking’ indang legal awareness sentong ka agiogo.
Anogo ka seminar nung jembidang Nagaland State Commission for Women (NSCW) mendenbula, Dr. Temsula Ao-i ashiba agi, nisung shibelenba tebilemtsü ya sensaker linük nung dang masü saka kanga renloker aliba linüktem nunga lir.
Tesasaba olen ka nung lai, nisung shibelen nütsüngji timbaka mines factory aser industry balala nung inyaker aser aayangertem aser teküp ayokba kitem nungi alartem lir, ta ashi.
Laisa, nisung shibelenba nungji ozüng, pei tangatetba, yimtenren aser rongsenkettsüng sendaktepa lir, ta ashi.
Dr. Temsula-i ashiba agi, nisung shilebenba tebilemtsü ya Naga tsürtem dak tali atalokdar aser iba ya lanurtem atema telung nung ola madoki tebilemtsü ka kümogo. Iba tebilemtsü ya temolung nung yur NSCW-i state ajunga nung lanurtem kümdangshia alitsü tesayuba balala agütsür. Nisung shibelenertemi, state alema orr mapa tajung aser taküm tajungba lidaktsütsü tenangzükba agütsübatem nung masadangi manidaktsüla saka parnok tebilembatem angateta mita alitsü asoshi lanurtem ajungshi.
Alima tesem ajunga nung nisung shibelenba anema raratsü asoshi tenangzükba agidang lai ashiba agi, “NSCW-i asen lokti nung nisung shibelenba dak sendakba nung tekümdangtsütem tesayuba balala agüja arudar aser iba anema raratsü asoshi nangzüker inyaker, aji asünung dang alima nung lokti balalai iba maparen anendaktsütsü merangba den asenoka densema 2020 tashi nungbo asen lokti nungi nisung shibelenba samadaktsütettsü.”
Iba sentong nungsa Additional SP, Relo Aye aser NSCW, legal consultant Khriesinuo Kire natia o tatsütsü jembi.
Tenati asenok temeden bushiba nung police shilem aser linük nung temzüng ozüng ajanga asenok nem teyari aser temeden balala agütsüba indang metetdaktsü.
Iba sentong nung ADC, Nungsangmenla Imchen, wadang balala nungi tetsürtem, kaketshirtem, lokti lenirtem, GBs aser DBs tem aden. Iba sentong NSCW züngsem Asangla Cholong lenisüba nungagi aser Sumi Totimi Hoho (STH) Tir, Kitoli-i sentong nung adenertem pelaa agizüka liasü.