NSDMA aser Addl. SP Phek-i nüburtem dang metetdaktsür

Dimapur, Chiteni/July 31 (TYO): Nagaland State Disaster Management Authority (NSDMA) ajanga Kohima, Phek, Wokha, Mokokchung aser Zungeboto indang DC & Chairmen DDMA nem osang ka metetdaktsüba nung, Chakabama-Pfutsero Bridge tekalen Sidzu ayong nung anentsüh aluba ajanga artificial tzünokdang (dam) ka kümteta tzü aika atsüngdena lir, aser iba ajanga tsünglanglen aliba nüburtem aser kiojen atema lendong tulu lir, ta shia lir.
NSDMA ajangasa Sidzu/Doyang ayong anasa aloyimer aser oli-orar dang Pfutsero-Chakabama lenmang nüng kümdanga jajatsü metetdaktsüogo. Iba tekümdangtsü ya nüburtem kümzüktsü mechi social media ajunga nung prokshitsü akok, ta kasa sangdong nung shia lir.
Ajungben lendong timtem aser nüngdakba mapang yariteptsü asoshi DC & Chairmen, DDMA dang State Disaster Response Force renema alitsü kasa sangdong nungsa metetdaktsüogo.
Additional SP & PRO, Phek, Tokavi Achumi-ia sangdong ka nung Phek District ajanga senzürtem dang, tzünglu maneni aruba ajanga lenmang aisü nung anentsüh alua lir, ta metetdaktsüogo.
Meluri aser Kiphire tsüngta Meluri jila nungi aruba lenmang 3 km, 8 km aser 16 km nokdangogo, ta Additional SP & PRO, Phek ajanga metetdaktsü. Meluri aser Lanezho tsüngta tesem ana nung anentsüh tulu alua lir; Lanye check Gate aser BSF Camp tsüngta aser Aksah Bridge aser Meluri tsüngta.
Chakabama aser RD Block, Kikruma tsüngta anentsüh tulu alua lenmang nokdanga lir, ta ketdangsürisa metetdaktsüogo.
Item tesemtem nung lenmang yanglushi tenzüka lir, saka tzünglu maneni aruba ajanga mapa inyakba nung timtem ajurur, ta kasa sangdong nung shia lir.
Item tesemtem nung police den department balala, SDRF team, Phek District aser volunteer temi lenmang lapokba mapa meranga inyakdagi, ta Additional SP & PRO, Phek, Tokavi Achumi-isa metetdaktsü.