NSDMA aser sepaitemi Dzükou nung len samartem bushitet

Kohima, Metsüremi (March) 19 (TYO): Kohima kübok Dzükou Valley nung Mumbai nungi aruba trekker pezü lenmang samar lia Nagaland State Disaster Management Authority (NSDMA) aser Assam Rifles külem telok kati parnok bushitetogo, ta NSDMA ketdangser kati ashi.
Mumbai nung aruba tourist pezüji yashi local guide manii dang Dzükou valley-i apuso aser parnok len sama, ta NSDMA nung OSD Johnny Ruangmei-i ashi.
Ajisüaka, parnoki kinungertem dangi osang sangoktsü aser kinungertemi Kohima nung aliba Catholic putir ka den tongtepratep aser yasüng 9:00 ako meta par pezü samaba osangji NSDMA ketdangsertem dang ashi.
Yasüng 9:30 ako meta NSDMA-i emergency response team ka par pezü bushitsü atema yok aser ano Assam Rifles o Territorial Army telok katia yaritep, ta Johnny-isa ashi.
NSDMA telokji Viswema leni atu aser sepaitemji Jakhama leni ao. Tanep 3:15 ako meta Assam Rifles jawan anati par pezüji angu, ta paisa shisem.
Par pezü ket nung chiyungtsü peria dang liasü saka yashi tzünglu kanga aruba agi parnok kanga mejungi metener liasü aser yimra agi tonger liasü. Parnok ajak Kohima-i tonga anir aruogo aser first aid agüja yaritepogo, ta NSDMA ketdangserisa metetdaktsü.
Dzükou-i atuba tenemkongji tangalen ama masü anungji tangalen nungi aruba trekker temi local guide anir ang senzütsüla ta Johnny Ruangmei-isa metetdaktsü.
Ano külen, PRO Assam Rifles-i ashiba agi tourist tem jagi Assam Rifles den tongtepratep aser idangjisa 3 Assam Rifles Kohima den 164 TA Battalion (Home and Hearth) meyoktepba specialist team ka yok.
Ghonda trok shi bushitepba sülen parnoki len samaba tourist tem den tongteprateptet aser relief agütsüba sülen anir aru, ta PRO-isa metetdaktsü.