NSDMA, Home deptt-i NEPEx sentong ayonga agitsü

Dimapur, Yimpoksüi/November 18 (TYO): Nagaland State Disaster Management Authority (NSDMA), Home Department-i achaayanga November 21 nü Nagaland Emergency Preparedness Exercise (NEPEx) sentong ayongzüka agitsü renema lir.
Iba dak sendakba nung November 20 nü 10:00 ako nungi tenzüka Secretariat Conference Hall nung table top conference ka agitsü.
AHODs/HODs ajak iba table top conference nung adentsü mepeshia metetdaktsüogo, kechiyong Incident Response System (IRS) dak ajemdaker parnok shilem aser khuret-tem iba senden nung benoka sensak asemtsü. Kasaji District Disaster Management Authorities (DDMAs)-isa kasa anogo district level nung table top conference ayonga agitsü.
NEPEx ya tsüngsang mongpu majungba ajanga lenmang raksaja tesendaktep aser tenüngdakba oset-tem nokdangba dak rangloker agitsü. NEPEx ya küm shia lendong timtem mapang State machinery koda renema ali ibaji tendangtsü asoshi agir, ta Nagaland Government OSD, Johnny Ruangmei-i sangdong ka ajanga metetdaktsü.