NSDMA-i ajungben tzümetsüng lendong atema metetdaktsür

Dimapur, April 22 (TYO): Nagaland kübok tesem kar nung ajungben tzümetsüng lendong ajuruba tatalokbatem nung ajemdaker Nagaland State Disaster Management Authority (NSDMA), Home Department-i sangdong ka nung nübortem kümdanga alitsü atema temetettsü kar agütsüogo.
Ajungben tzümetsüng lendongji kanga kara ataloker, anungji tzü atsüngdenba metetra tekaratiba iba tesem toktsütsüla, ta NSDMA sangdong nung shia lir.
Gari anirtemi tzü atsüngdena aliba tesemtem adena mesenzütsü, power lines & electrical wires nungi pila alitsü aser electric ajanga amshiba osettem agizüka ayutsüla, ta NSDMA-isa metetdaktsü.
Ajungben tzümetsüng adoktsü akok ta arentaka bilemba tesem nung alirtemi tzü tajemtsü aser mela meraksaba mesüra tazü chitetba chiyungtsütem peria bendena ayutsüla. Ano, item tesem nung alirtemi sen, mozü, abensüoshi, battery ajanga amshiba radio, Flashlights aser tongtipang kulikakettem bendena ayutsüla, ta parnokisa ashi.