NSDMA-i Chuchuyimlang Circle osang jangjashitsür

Dimapur. August 27 (TYO): Mokokchung District kübok Chuchuyimlang Circle nung Village Council temi osang sangdongba atema Nagaland State Disaster Management Authority (NSDMA), Home Department-i telangzüba ka agütsüogo.
Tang state nung relief rice alemba ya NSDMA ajanga Chief Minister’s Relief Fund (CMRF) kübok agütsür. Iba ya 2018 küm lendong balala agi kongshir nem agütsüba lir, anungji Government of India (GoI)-i SDRF kübok agütsüba den memeyokteptsüla, ta Commissioner and Secretary to the Government of Nagaland, Rovilatuo Mor, IAS-i sangdong ka nung ashi.
Chuchuyimlang nung EAC-i relief jang agizüktsü atema osang agütsübaji SDRF kübok teti anguba relief dang nungi talila agütsüba lir aser SDRF kübok agütsüba relief ta mebilemtsüla, ta Mor-isa ashi.
2016 küm yipru agi takoksa bener arutsür nem 2016-17 mapang DDMA Mokokchung-i SDRF inyakyim nung aliba ama teyari agütsüogo aser iba atema Chuchuyimlang Village Council-i osangkakettem nunga teyari agütsüba atema pelaba osang lemsatepa liasü, ta paisa shisem.