NSDMA nungi senotsü teyari angur tenüngtem meshir

Dimapur, June 09 (TYO) : Nagaland State Disaster Management Authority (NSDMA/SDRF)-i 2010-11 nungi 2014-15 küm tashi nung State Disaster Response Fund (SDRF) tenüng nung ‘Grant-in-Aid’ sen  Rs. 19,41,00,000/- (Rupees nineteen crore and forty one lakhs) angu aser iba senji district 11 prongla nem lemtsüba nungi nisung 15,288 teyari angu. Item teyariji alima lendong timtem kitsük kirong, anentsü aser yipru mopong ajanga timtem takoksa ajurutem nem agütsü ta senso tajung kari RTI ozüng ajanga metetnüa asüngdangba telangzüba agütsüba nung SDMA-i shia lir.

SDMA-isa Uttarkhand nung lendong ajururtem nem teyari sen lakh ter June 24, 2013 nü agütsü aser kija kibong nem teyari agütsüba senji Rs. 69,15,430/- (Rupees sixty nine lakhs, fifteen thousand four hundred and thirty) liasü saka parnoki item teyari angurtem tenüngtemjibo memetetdaktsü. Iba sülen tang sen Rs. 6,41,99,599/- (Rupees six crore, forty one lakhs, ninety nine thousand, five hundred and ninety nine) mamshii yua aliba amai angatetter ta item inyakyim bushirtemi metetdaktsü.

2010-11 nungi 2015-16 tashi nung Finance Department-i ter trokben  tashi nung SDMA nem sen Rs. 86, 75, 17,000/- (Rupees eighty six crore, seventy five lakhs and seventeen thousand) agütsüba metetogo, anungji iba sen teyari angurtem tenüngji metetdaktsütsüla ta parnoki takangba ka agütsüogo.

Item ama inyakyim osang metet nung dang nübortem pei temeten aser pei shilem meteta akümtsü, anungji item inyakyim tejangjaji nübortem nem metetdaktsütsü asoshi onoki iba ama osang metetnüa meshir ta parnokisa metetdaktsü. Parnokisa iba ama sen ya kechi atema, komaser shirnok ajanga amshi aser teyari angurtemji shirnok metetner ta asüngdanga lir. Nübortem ajangzükdaktsütsü asoshi item temetettsütem metetnüa RTI ozüng ajanga asüngdangertemji  Aheto V.Yeputhomi, Hukavi T.Yeputhomi, Kihoto S.Rotokha, L.Khevishe Achumi aser S.Zhevishe Sumi nungertem liasü.