NSEFSA lokti mungdang agi

Dimapur, October 31 (TYO) : Honibarnü Nagaland State Excise Field Staff Association (NSEFSA) pur Excise Directorate, conference hall nung lokti mungdang agi.
Iba sentong nung tongti tesemdangerji Commissioner of Excise, V. Maria Yanthan liasü.
“Tanga department den medemdangra Excise department ya department tila ka dang saka tebilemtsü khuretbo ulura. Anungji department nung inyakertem ajaki tebilemtsü khuret angateta tajungtiba nung mapa inyaktsü ayongzüker” ta Maria Yanthan-i ashi.
Asenok ajak sorkar mapa inyakertem lir anungji kodangsa union mesüra association-i telemtetba agitsüsa kümdir government service conduct rules anema magitsüla, ta laisa metetdaktsü.
Sorkari department tekolakpur nem ketdangsütsü tashi agüja lir anungji staff-i nendaka inyaktsüla aser department nung temelenshi bener arutsü atema yariteptsüla, ta Commissioner of Excise-isa tayongzükba agütsü.
Sentong nung KG Yeptho, president, NSEFSA-i tesentepertem pela agizük aser Pithongse Sangtam, Additional Commissioner, Excise-ia o jembi.