NSF aser ANCSU-i non-indigenous onük nenshir

Dimapur, Luroi (August) 20 (TYO): Nagaland state quota kübok non-indigenous nisungtem nem MBBS, BDS aser professional Courses atema menden melemzüktsütsü atema Naga Students’ Federation (NSF) aser All Nagaland College Students’ Union (ANCSU) teloktemi nenshia metetdaktsüogo.
Taitsü aketba candidate tem indang tsüraburtemji Manipur state 2018 indang electoral voters list nung tenüng züluoka lir, ta ANCSU Vice President Benjong Longchar aser NSF Education Secretary Muphato Nyuthe nati ashi.
Taoba mapang takhangba agütsüba nung NSF aser ANCSU masetshii noktaka lir aser Directorate of Technical Education dang ashishitep aketba candidate tem state quota kübok menden magütsütsü atema kümdangtsü metetdaktsür, ta tenatisa ashi.
Taitsü aketba candidate tem indang tsüraburtem tanga state indang e-roll nung tenüng züluoka lir anungji parnok Nagaland State nung indigenous inhabitant ta züngoktsü makok. Anungji, mangatettep aser tekong merangtepba tensa ka majurudang Director of Technical Education-i tekaratiba nung mapa inyaktsü mepishir, ta ANCSU aser NSF ketdangpurtemi ashi.
Ashishtep aketba candidate tem indang ST & Indigenous Certificates shi chichiba masü aser kuli tejangja mebushii parnok nem agütsüba lir, anungji state sorkari kulikaket agütsüba ketdangsertem anema disciplinary action agitsüla.
October 4, 1995 nü office Memorandum nung shia aliba kuli tejangja mebushii ST& Indigenous certificates agütsüba ketdangsertem ozüng tapet agi merenshitsüla, ta ANCSU aser NSF teloktemi takhangba agütsü.