NSF aser CPO-i Naga Hoho longjema lidaktsüner

Kohima, Sept.27 (TYO) : Nagaland nung aliba Naga kin asem Ao, Lotha aser Sumi nungertem Naga Hoho nung medeni atsüngadokba telemtetbaji Naga nunger longjemtsü mechi khen meyipa reprangshitsüla, kechiyong tang ama India den Naga yimten ken o jembidang Naga nunger longjema alitsübaji kanga tenüngdaktsü kümogo ta NSF teloki metetdaktsü.

NSF telokisa Nagaland government dang Rongmei nunger Nagaland nung kin ka ama züngokba telemtetbaji Naga nunger telongjem meraksatsü mechi reprangshitsüla ta metetdaktsü.

Nagaland government-i Rongmei  nunger Nagaland nung kin ka ama züngokbaji tim masü kechiyong parnokji Manipur nungang kin ka ama züngoka lir aser Nagaland nungbo parnok tetsü teboui yatetba alumang kata maka ta Chakhesang Public Organisation (CPO)-i metetdaktsüogo. Anungji, state government-i iba telemtetbaji yaktasa reprangshitsüla ta parnokisa metetdaktsü.

CPO-isa  kasa ken o nung Naga Hoho nung adener Naga kintem rongnung mangatettep adokba ya ajurutepa jembitsüla aser tangatettep kati arutsüla ta metetdaktsü.

Ano, tanüsa Naga Hoho sangdong ka nung tamalen metetdaktsüba ama, September 28, 2016 anüngdang 11:00 ako nungi Hotel Japfu nung Naga Hoho Federal Assembly alitsü ta Naga Hoho Assembly Secretary, Wb.K.Elu Ndangi nenshia  metetdaktsüogo.

Iba senden nung  Rongmei  nunger dak aketba ken o den Nagaland Municipal Act 2001aser Naga nunger yimten nüchiso asoshi jembi tenzüker küm 100 ajungba mong amongtsü indang ken lemteptsü ta paisa metetdaktsü.