NSF & CNTC-i sorkar dang tesayurtem nem itasen agütsütsü mepir

Kohima, October 31 (TYO) : Centrally Sponsored Scheme kübok SSA aser Hindi tesayurtem nem ita tenet tashi itasen magütsüi alibaji tekaratiba nung agüjang ta Naga Students’ Federation (NSF)-i state sorkar dang mepishi.
SSA scheme kübok shimba aser Hindi tesayurtem ita aika itasen mongui dang mapa inyaka arur aser parnoki aiben sorkar aser bangdak department dang iba khuret lemsatepogo saka telangzüba kecha mali, ta NSF secretary education Imtiyapang aser editor Müphato Nyuthe nati Nagaland Chief Secretary dangi züluba shidi nung shia lir.
“Iba onük süoki ia agitsü aser tekaratiba nung itasen agütsütsü atema ayongzüker aser sorkari itasen magütsüra, NSF-i tesayurtem pusema mapa inyaktsü,” ta NSF-isa Chief Secretary dang shisem.
Ano, CNTC-ia tanga sangdong ka nung, NSSATA/RMSA/Hindi teachers nem tesüiba ita 6 nungi 9 tashi itasen magütsüi aruba indang shia lir.
Centre indang scheme balala kübok shimba tesayurtem nem parnok itasen magütsüi timtemdaktsür aser iba ya meimchir temeten anema inyakba mapa ka lir. Tesayurtemji linük yangertetertem lir saka parnok tangutsü tim itasen dena magütsüi okrongdaktsüba angudang CNTC ola madok meliteter, kechiyong tesayurtemji asen chinurtem dang lir, ta Media Cell CNTC sangdong nung shia lir.
Centre-i sen magütsür ta tatemtsü agüja state sorkari teti mejenbutettsü, kechiyong kibong ka nung tebu kati par kibong aser tanurtem achiajemtsü atema senotsü tangutsü tim bushir bener arua mesür, ta CNTC-i ashi.
Kümshia Teachers’ Day nung yimsüsürtem aser ketdangsertemi tesayurtem ayongzüka o jembiba aser yearly awards agüja tenüngsang agütsüba agidangbo mepirir. Tesayurtemji senti ta bilemtsüla aser parnok nem akhümtsübu agüja tushitsüla saka tanübo iba amaji masü lir. Anungji, state sorkari timtemba tesayurtem nem tekaratiba nung itasen magütsüi aliba agüjang ta CNTC-i ayogzüker, ta Media Cell sangdong nungsa shia lir.