NSF dang Naga nunger lungjemba nung shilem agitsü ayongzük

Dimapur, Luroi/August 29 (TYO): Hokulbarnü Arunachal Pradesh legislator Laisam Simai-i Naga Students’ Federation (NSF) dang Naga nunger lungjemtsü asoshi shilem tulu agitsü ayongzük.

Tseminyu nung NSF indang 31 buba Inti Mungdang valedictory session nung jembidang, federation ya kaketshir tentet ka dang masü saka Naga nunger lenirtem lir, ta Simai-i ashi.

Federation-i ‘internal welfare’ alema oa rangloktsüla aser sorkar agencies aser danga lokti tentet balala den teka amteper employment asoshi inyaktsüla, ta MLA Simai-i ashi.

Simai-i lanurtem dang pei tera nung teti sendaktepa alitsü aser tesüiba lenirtemi bendanga agütsüba kodanga mamadoktsü ayongzüka liasü.

NSF ketdangpur tasen shimba nung tetsür kata maliba indang pai tuteta ashi aser tarutsü nungbo tetsür shilem agidaktsütsü ayongzüka liasü.

Kasa sentong nung Advisor to chief minister & Chairman, IDAN, Abu Metha-i jembidang, NSF ya Naga nunger asoshi akang-akanga nokdaka aruba institution ka lir, ta ashi.

“Naga nunger külemi ka ama nokdaktsü aser takok angutsü nükjidong ayutsüla. Lanurtemi takok anguba ajanga Nagaland ya tanü dang nungi asüng tajungba kumdaktsütsü,” ta pai NSF lenir tasentem ayongzüka liasü.

Kasa mapang 1947 küm NSF tenteter tang mezüngbuba Zeliangrong kin nungi tir inyaktsü shimogo.

All Zeliangrong Students’ Union nungi Mteisuding ya NSF 2025-2027 kümsük asoshi tir inyaktsü Hokulbarnü federation indang general election nung shima liasü.

Vote 34 nungi pai vote 14 nguteta All Sumi Students’ Union (Sumi Kiphimi Kuqhakulu) nungi Ineka Z Awomi (votes 12), Ao Kaketshir Mungdang nungi Benjong Longchar (votes 6) aser Lotha Students’ Union nungi Chumben (votes 2) nunger madak takok ngua liasü.

NSF ketdangpurtem tasen shimba nungya vice president Vimeyiekho Vitso, general secretary Kenilo Kent, assistant general secretary Veze Tunyi, secretary (social and culture) Thejalhoukho Thomas Khawakhrie, secretary (education) Ajo Tsela, secretary (finance) Katho P Awomi, secretary (publicity and information) Temjentoshi aser federal assembly indang speaker Marik O Leriina nungertem alitsü.

NSF tir tasenba Mteisuding-i Naga nunger aser federation units temi pa dak tamang akaba asoshi pelaba lemsatep aser ochimashi anema nokdaktsü, lanur tashi aser telungjem asoshi inyaktsü nangzüka liasü.

Mteisuding ya taoba mapang NSF nung secretary (publicity and information) aser vice president inyaka lir tir inyaktsü shim.

Change of guard ya August 30 nü agia NSF indang 31 buba Inti Mungdang tembangtsü.