NSF dang tenüng tajung tanaben meyipa bener arutsü ayongzük

Kohima, October 29 (TYO): Nagaland nung kaketshir telok tongtiba- Naga Students’ Federation (NSF) tenteter tanü küm 70 abensaogo.
70 buba Foundation Day amungdang NSF-i Naga loktiliba yanglushitsü aser tenüng tajung meyipa bener arutsü atema bendanga agütsüshir inyaktsü tayongzükba agütsü.
NSF ya Naga yimten tebilemtsü timi lemtettsü aser Naga loktiliba tajungba nung yangertsü atema tongti süa tentet, ta taoba NSF President, N. S. N. Lotha-i o jembidang ashi.
“NSF jenjang tamajung akümer aser tenüng tajung samaogo. Anungji, tang NSF ketdangpurtemi tashimaitbatem metettsü merangang aser tenüng tajung tanaben bener arutsü atema nendaka mapa inyaktsüla” ta N. S. N. Lotha-i ayongzük.
“Nenoki nendaka aser bendanga agütsüshir inyakra, NSF tajungba kümdaktsütsü atema onok tejenpurtemia onok akokba tashi nenok nungittsü” ta paisa shisem.
Sentong nung taoba NSF President Achumbemo Kikon-ia tajungshi o jembidang, “NSF-i tesentaktep samar alibaji bushitepa sendakteptsla aser Naga yimten tebilemtsü atema milentong amer ka ama tenüng tajung tanaben meyipa bener arutsüla” ta ashi.
Sentong nungsa taoba Vice President Neikuo Lhousa aser taoba general secretary Vivi Nyuthe natia tajungshi o jembi.
NSF President Kesosul Christopher Ltu-i tir o jembidang, tang teinyakdak ketdangpurtem tashi itshitsü atema tejenpurtemi tebilembatem aser shisatsü lemsateptsü ayongzük.
Sentong nung mendenji Secretary Information & Publicity, E Krelo liasü, Pochury Baptist Church Associate Pastor, Z. Mosa Tsang-i temoatsü meshia sarasadem aser Secretary Social & Culture, Dievi Yano-i anküp tepela o jembi.