NSF & ENSF-i Oct 12 nungi lungkak aittsü

Kohima, October 9 (TYO): Hokolbarnü Chief Secretary jenjang nung senden amendang tangatettep kati marutetba agi Naga Students’ Federation (NSF) aser Eastern Nagaland Students’ Federation (ENSF)-i October 12 nungi lungkak aitba sentong agitsü lemtetogo.
Tanü Nagaland sorkar aser NSF o ENSF tsüngda Sarva Shiksha Abhiyan (SSA) aser Rashtriya Madhyamik Shiksha Abhiyan (RMSA) tesayurtem onük atema senden ka amen.
2010 aser 2013 batch SSA aser RMSA tesayurtem ya Nagaland School Education cadre nung anioktsü atema sorkar dang akhanger.
Senden nung state sorkari SSA aser RMSA tesayurtem anioktsü atema mapa inyakdar aser iba nung senotsü maparen dena lir ta ketdangsertemi ashi.
Sorkari tezüluba nung tesayurtem mapang lateter mapa nung anioktsü atema nangzüktsüla ta NSF aser ENSF-i tanü senden nung nenshia metetdaktsü.
“Ajisüaka, tanü senden nung telemtetba ka magitetba agi NSF aser ENSF-i October 12 nungi Nagaland nung sorkar meyong garitem mesenzüdaktsüi lungkak aittsü lemtet. Iba ya lungkak aitba mezüngbuba shilem asütsü,” ta NSF general secretary Liremo R. Kikon-i metetdaktsü.
Tanü sorkari Chief Secretary in-charge J Alam menden ser sendenji amentsü ayongzük.
State Civil Secretariat nung amenba senden nung NSF nungi nisung 5 aser ENSF nungi nisung 4 aden, ta Liremo Kikon-isa ashi.