NSF-i 80 buba Independence Day ayongzüka among

Kohima, August 14, 2026 (TYO): Naga Solidarity Park, Kohima nung NSF-i ayongzüka 80 buba Naga Independence Day amungdang o jembirtemi Naga nunger longjemtsü, külem maitsü wazüka ayutsü aser Naga yimten tekaraba nung latettsü indang jembiogo.

India’er Independence Day jakdang anogo ka jelia amungba benjung nung Naga National Flag atsüket aser Naga telok balala nungi teshimtet nübotem den public-i shilem agiogo.

Iba sentong nung o jembitsü atema jaoker Advocate Tongpok Pongener-i ashiba agi “küm 80 tejakdang August 14 ya Naga Independence Day ta sangdonga liasü aser iba ya Naga lennirtem aser loktitem külemi longjemer inyakba ajanga koktetba mapa ka liasü.”

“Iba mapang lennirtemi temulung ka asütsü atema yimtsüngtem sema senzü aser par putu nung modern communication facilities maliasü” ta pai ashi.

“Iba mapang Naga nungeri shinga kübok malitsü taginüba tulu liasü aser linüktem rongnung linük ka ama liyonga onüa liasü. Parnoki kidangertem den tesentaktep tajung yur linüa liasü” ta Advocate Tongpok Pongener-i ashi.

Ajisüaka, Naga movement nungsa tammang putiotsü ka lir aser iba otsü nung Naga nunger sasep nung mangatettep, azütokshitepba aser Naga loktiliba loksaa aoba lir ta pai ashi.

“Asenok longjemba loksaa aotsü tenzük aser maneni telemsa adokra aser temulung melemtepra, Naga nungeri taginübatem metongtettsü” ta pai tebilemdangtsü olen ka ashi.

Naga loktiliba sasep nung telok balala loksa aoer aser telemsa aliba ki ka menokdaktettsü. Anungji asenoki kintem aser teloktem tsüngda temulung lemtep aser adianu tangatetba adoktsü atema meranga inyaktsü nüngdaker ta Advocate Tongpok-isa ayongzük.

Paisa lanuputu dang loktiliba nung apulartem asütsü mepishia ashi. “Nenok pei pei kin aser teloktem nung dang melii kin aser telok balala tsüngda apulartem asütsüla” ta Tongpok-isa ayongzük.

Paisa Khristan tesayubatem sülen anidaktsü aser Naga nungeri tesüiba nung aibelenbatem nungi angazüker Tsüngrem dang nungi shisatsü meshia alitsü ayongzük.