NSF-i aitsür & bushisüngtsü akhanger

Dimapur, May 20 (TYO): Ozüng alema mapa inyaker Vijay Parmana-i Nagaland nung yimsüsür ka tepsettsü contract agiba osang angashia kanga aoksar aser iba inyakyim khukhua aitsür, ta Naga Students Federation (NSF)-i metetdaktsü.
Sorkari security maparen kanga junga reprangshimtsü aser iba onük atema special enquiry committee ka tenteta tatem tonga bushisüngdangtsü takhangba agütsür, ta NSF-i ashi.
Maneni NSF-isa Eastern Naga Area kübok Konyak region nung Tatmadaw-i NSCN (K) tesep amakba aitsür ta metetdaktsü.
Tatmadaw-i iba mapa inyakba ya 2012 küm Myanmar sorkar aser Naga nunger tsüngda ceasefire agreement agiba alema lir. Iba ama rara ajanga tai maket yimdaklirtem aser public tali timtemdaktsür, ta NSF President Kesosul Christopher Ltu aser General Secretary Imtiyapang Imsong nati sangdong ka nung ashi.
“India aser Myanmar tsüngda Indian Armed forces-i ngua Tatmadaw-i iba mapa inyaker anungji Indian Armed forces-i iba nung kechi shilem agir?” ta NSF-isa asüngdang.
Tatmadaw aser NSCN (K)-i rara anentsüla aser nübortem taginüba ama olemtep lia angatetteptsü ayongzüker. Talisa, alimai iba ama rara menaba ya aitsütsüla, ta NSF-isa metetdaktsü.