NSF-i banner aser poster campaign tenzüker

Kohima, Aenjeti (January) 16 (TYO): Naga Students’ Federation (NSF)-i Nagaland nung banner aser poster campaign ka tenzükogo aser iba ya Naga yimten melatet tashi election magitsü atema lir.
NSF-i tongti süa akhangbaji “No Solution, No Election” lir.
Naga civil society teloktem, kin hohotem aser state sorkari Centre sorkar dang State Assembly elections magidangdang Naga yimten latettsü atema takhangba agütsür.
“Taruba general elections magidangsa Naga yimten latettsüla ta onoki akhanger” ta NSF lennir Kesosul Christopher Ltu-i ashi.
Takhangba ama mapa meinyakra NSF-i Assembly elections mokdangtsü akok ta paisa ashi.
“State Assembly election ajanga Indo-Naga yimjung maparen nung tetsükdaktsü bentsür arutsü akok aser atsülangtsü” ta NSF indang office kima nung yua aliba banner ka nung zülua lir.
“Küm 20 tashi olemtepa aruba ya ojang”, “Asüng atema Naga yimten latettsüla” aser “Onoki election masü, solution aginür” ta poster tem nung zülua lir.
NSF-i Aenjeti 23 nü Naga Solidarity Park, Kohima nung lokti sentong ka agitsü atema ayongzükogo.
Nagaland State General Assembly Election matongdang India sorkari Indo-Naga olemtep asoshi tatembang telemtetba ka agiang ta ashitsü atema iba rally ya ayongzüker ta NSF mendenpurtemi ashi.