NSF-i ILP kübok Dimapur district dendaktsütsü akhanger

September 14, 2018 nü Dimapur nung NSF-i ayongzükba sentong nung adenba kaketshirtem kar noksa nung angur. 

Dimapur, Rongjui (September) 14 (TYO): Ozüng alema arurtem azüoktsü aser noktangtsü atema Naga Students Federation (NSF)-i tanü Dimapur nung public sentong ka ayonga agi.
Bengal Eastern Frontier Regulation (BEFR), 1873 nung aliba ama Inner Line Permit (ILP) kübok Dimapur district dendakjang ta takhangba agüja NSF-i tanü iba sentong agi.
Tetenzükdang yongi ILP mapa shitak metenzük aser iba jagi ozüng alema arurtem talila akümba ajanga tanü lisopurtem lendongbang ka nung lir. BEFR mapa küma meinyakba aser ILP telongtet kübok Dimapur district medendaktsüba ajanga Dimapur ya ozüng alema arurtem tejenokdak tajung ka kümogo, ta NSF tir, Kesosul Christopher Ltu-i o jembidang ashi.
State sorkari Assam den arrtsüa aliba Dimapur district ya ILP telongtet kübok dendaktsütsüla, ta paisa shisem.
State sorkari ILP mapa shitak meinyakteter aser check gates nunga ILP junga merepranger, ta Ltu-isa metetdaktsü.
Tiyongtsü nung nisung kari sen noklang ishika atema ashishitsü aketba nisungtem atema ILPs renemtsür. Ajisüaka, kaketshirtemi Naga nunger tarutsü tia meraksadaktsütsü anungji tiyongtsü nung mapa inyakertem dak tapet mapa inyaktsü, ta NSF tirisa kümdangtsü olen ka ashi.
Paisa council tem dang tashishitsü aketba nisungtem indang maitsü jungjunga jangjaba sülen ang pei colony mesüra yimtsüng telongtet nung lidakjang ta ayongzük.
Nagaland telungi ozüng alema arurtem noktangtsü atema tawa tu state sorkari joint committee ka tentetogo. Naga yimten tebilemtsü ya Naga nunger ajak atema kanga tongtipang ta Naga yimten teloktem dang nenshia metetdaktsür. Naga yimten teloktemi bendanga agüja inyakba den kaketshirtemi tali bendanga agüja inyaker. Anungji, Naga nungeri illegal Bangladeshi immigrants (IBIs) mesüra tashishitsü aketba nisungtem nem Naga yimten tebilemtsü tenüng amer Naga nunger amokmeren mesüdaktsütsü, ta Ltu-isa metetdaktsü.
Sentong nung taoba NSF president aser High Power Committee (HPC), Dimapur Naga Students Union Convenor, K Temjen Jamir-ia o jembi.