NSF-i kaket aser nüngdakbatem agütsütsü nenshir

Dimapur, Tsüklai 21 (TYO): Naga Students’ Federation (NSF)-i State sorkar aser Department of School Education dang sorkar school tem nung azüngba kaketshirtem nem Text books, study materials aser school uniforms angati agütsütsü atema nenshia metetdaktsüogo.
Sorkar school tem nung azüngba kaketshirtem nem Text books, study materials aser school uniforms tekaratiba nung agütsütsüla aser school uniform artsü atema sü dang agütsüra, arba taaji kaketshirtem nem agütsütsüla ta NSF-i ashi.
NSF-i 22-10-2017 nü School Education Minister dang tesüiba küm ishika Text books, study materials aser school uniforms mapang shitak nung magütsüba aser küm tom nungang agütsüba indang shidi ka nung metetdakja liasü, ta NSF Tir Kesosul Christopher Ltu aser Tongti Tezülur Imtiyapang Imsong nati tanü sangdong ka nung ashi.
NSF-isa 25-1-2018 nü School Education Minister dang iba onük nenshia metetdaktsü. Ajisüaka, Tsüklai 2018 hopta tanabuba tashi nung sorkar school ajak lapokadokogo sala tang tashi kaketshirtemi text books aser study materials indang “single set” ka danga mangu lir. Tesüiba kümtem ama sorkar school tem nung kaketshirtemi school uniform mangu lir, ta NSF mendenpurtemisa ashi.
Kaketshirtem nem mapang shitak nung tagütsütsü tim magütsüra NSF-i Directorate of School Education aser Implementing Agencies (Mission Offices) shibangtsütsü, ta NSF-i metetdaktsü.