NSF-i lennirtem asoshi shisatsü meshija sarasadem

October 28, 2019 nü Kohima nung NSF candle light vigil cum prayer service alidang agiba noksa angur. 

Kohima, October 28 (TYO): Naga aser India sorkar tsüngda olemtepertem nem tangatetba shisatsü agüjang ta sarasadema taonung Kohima nung aliba NSF office nung shimomilen tsükloker sentong ka agiogo.
Iba sentong nung kaketshirtem aser Naga kin balala nungi nisungtem aden.
October 31 nü Naga yimten tebilemtsü atema telemtetba ka magidang Naga Students’ Federation (NSF)-i Candle Light Vigil cum Prayer Session ya ayonga agiogo.
Sentong nung o jembidang NSF president Ninoto Awomi-i “kechi telemtetba agidir agiaka, iba nung ajak adentsüla aser ajaki mulungtsüsa asütsüla” ta ashi.
Iba mapa tongtipang mapang ka nung, India sorkari telok ka (Naga Nationalist Political Group) den dang tenangzüktep ka agitsü akok ta Naga nungertemi bilemer. Iba amaji inyakra Naga loktiliba nung yimjung masü saka mepetmesü ang tali adokdaktsütsü, ta Awomi-i ashi.
Naga nunger nem teti atema yimjung bener arutsüsa, ajaki agizüktetba aser akhümtsübutsüsa telemtetba ka agidaktsünür, ta paisa shisem.
“Iba ama Naga yimten atema tongtipang mapang ka nung sarasadem kanga tongtipang aser Tsüngrem teyari kanga nüngdaker” ta NSF President-isa metetdaktsü.