NSF-i Lotha nunger loktitentet balala den ILP khuret lemsatep

Dimapur, November 29, 2025 (TYO): Naga Students’ Federation (NSF)-i November 29, 2025 nü Lotha Hoho aser parnok den sendaktepba teloktem den Inner Line Regulations (ILR) akangshitsü aser iba dak sendakba onüktem lemsateptsü atema senden ka menogo.

Lotha Hoho Headquarters, Wokha nung NSF Vice President Eno Vimeyiekho Vitso menden ser iba senden amen. Senden nung Secretary General, NESO aser taoba NSF president Eno Mutsikhoyo Yhobu aser taoba NSF president Eno Ninoto Awomi na aden.

Bendangertem aruba azüoktsü, lisopur maitsü wazüka ayutsü aser Naga lanurtem lokti-rongsenketzüng nung tejakleni aotsü onüktem benoka lemsatep.

NSF President Eno Mteisuding Harang-i okila jembidang ozüng alema arurtem mazüokba ajanga lendong bentsür arutsü tia ka ajuruogo ta ashi.

“Asenoki non-locals nem ILP, PRC, aser trade licences mashii agütsüba atema tebilemtsü abener kechiyong item inyakyim ajanga lisopur temetentem tashimait kümdaktsür” ta pai ashi.

Paisa lanurtem dang sorkar mapa nung ajak anioktsü makok anungji shishilembatsü aser entrepreneurship lenmang bushia inyaktsü ayongzük.

NSF-i Naga maitsü, sobaliba aser inyaksangshi kümzüka ayutsü atema noktaker ta Eno Mteisuding-isa ashi.

“Lisopur temetentem kümzüka ayutsü atema onoki inyaker. Iba asoshi asenok külemi inyaktsüla aser state sorkaria NSF ajanga abenba onüktem agizükba tekaratiba nung mapa küma inyaktsüla” ta ILRC Chairman Eno Sechumo NSN Lotha-i ashi.

Dimapur Airport aser Railway Station nung ILP checkpoints lapoktsüla kechiyong item ajanga tangartem Nagaland telungi aiter, ta pai ashi.

“Mapa shitak meinyakba aser ozüng alema arurtem junga mita mereprangba ajanga asenoki timtem ajurur” ta Lotha Hoho President Eno Er. Mhondamo Ovung-i ashi.

“Ketdangpurtemi kechiba bendangertem state telungi aiter ta asüba kuli bushitsüla. Külen, Naga nungeria shishilembatsü aser aayangtsü maongkatem agir asü magir? Maparen shitak tenzüka meinyakra railway connectivity ajanga bendangertem teimba arutsü ana nung lir” ta Er. Mhondamo-isa ashi.

Lotha Eloe Hoho President Enoli Thungbeni Ngullie-i o jembidang NSF aser ILRC movement pusema nungitba ashi.

“Lokti nem meteta lidaktsütsü asoshi tetsürtemi shilem agitsüla aser district administration-ia civil society den amalitepa inyaksangshitsüla. Iba onük asoshi tetsür temeja atema sensitisation programme ka ali nung junger” ta Enoli Thungbeni-isa ashi.

“Wokha nung shishilembabaren 70-80% tashi non-locals ajanga inyaker. NSF-i aniba campaign pusema nungiter aser “local guarantors” ajanga tim masü inyakba odangbo metoktsütsü” ta Lotha Youth Hoho President Eno Limhathung Yanthan-ia ashi.

“Lotha Students’ Union (LSU)-i ILP mapa inyakba nung amalitepa yariteptsü aser bendanga agüja NSF yaritsü” ta President Eno Lirhonthung Kithan-i ashi.

“Nagaland nung border checkpoints maliba ajanga non-locals-i aiben ILP melii arur. Iba sülen parnoki district offices nungi ILP agizüker saka iba ya tim masüba inyakyim ka lir. Nagaland nung tongtipang entry points ajak nung ILP counters lapoktsüla aser bendanger karibo ILP passes aika meshia agir” ta LSU President-isa ashi.

Tawa mita aodang nisung aika ILP tejangja maliba atema meyipa yokogo saka item kasa nisungtemi Dimapur ajanga ozüngi memelaba pass bener aru. Iba ajanga ILP dak sendakba maparen inyakba nung tim masüba aser amalitep maliba sayur, ta paisa ashi.

Senden nung adener ajaki Naga maitsü kümzüka ayutsü aser tarutsü lanu putu asoshi inyaktsü tenangzükba agishiogo.