NSF-i Manipur registration gari ajak noktangtsü tenzükogo

Dimapur, February 24 (TYO) : Naga Students Federation (NSF)-i February 14, 2016 nü tatalokba dak sendakba nung Manipur sorkar nem anogo tenetnü mapa inyaktsü atakzüktsü saka parnoki mapa kecha meinyakba atema NSF-i Bodbarnep nungi Naga nunger aliba tesem ajak nung Manipur registration aliba garitem noktangtsü tenzükogo.
Tanep 6:00 ako nungi iba tenokdangba ya tenzük aser tatalokba tamajung kecha melii tanü anogo süiogo.
Dimapur nunga Dimapur Naga Students Union, Diphuphar Naga Students Union aser Chakro Angami nungi nübo tenlatepa Assam nungi Nagaland telungi Manipur nunger gari ka danga maitdaktsüi noktangogo.
Yasüng ayaterm tashi nung telangzüba kecha maruba agi NSF kübok federating unit tem nungi nübo tenlatepa Meitei nunger indang gari ajak noktangtsü tenzük. Manipur nung Senapati district matong tashi Naga nunger aliba tesem ajak nung garitem noktanger, ta NSF tir, Subenthung Kithan-i metetdaktsü.
Nagaland sorkari tenokdangba meyipa reprangshitsü atema NSF dang mepishiogo saka NSF-i takhangbaji Nagaland sorkar nem masü saka Manipur sorkar nem agütsü asünung lungkak aitba sentong maneni agitsü, ta Subenthung-isa ashi.
February 16 nü NSF-i Manipur sorkar dang Manipur State kübok lendenlen aser temeket nung Naga nunger aser Naga nunger garitem lendong nungi kümzüka ayutsü atema takhangba agütsü.
February 14, 2016 nü NSF nungi teshimtet telok ka Lui-Ngai-Ni benjung nung adentsü aodang Imphal district kübok Mantripukri tesem nung Manipur Police Commando telok kati parnok dak tashiyim mapa inyak.
Iba tatalokba atema NSF-i Manipur sorkar dang duty officer in charge mapa nungi anentsütsü aser NSF telok dak tashiyim mapa inyakba police ajak mapa nungi anenja atatsü atema takhangba agütsü.