NSF-i Manipur sorkar dang akanger

Dimapur, Feb.17 (TYO): Tan February 14, 2016 nü Naga Students’ Federation (NSF) lenirtem Imphal nung Manipur police-temi soter amokmerena mezüngmeshiba asoshi Manipur sorkar-i NSF dang yashi nungi zünga anogo tenet tsüngda taidok meshitsüla, ta NSF teloki takangba ka agütsüogo.
NSF lenirtemji Ukhrul nung Lui-Ngai-Ni benjong nung adentsü asoshi aoerba liasü aser iba mapang Imphal nung Mantripukri ta ajaba tesem ka nung Manipur policetemi parnokji soter o tamajung shia mezüngmeshia amokmeren, ta NSF lenirtemi metetdaktsü. Iba mapang Naga nunger süisüponger tain kari ngua parnokji mekümzük asübo, NSF lenirtemji Manipur policetem jagi pua bener orr kechika kümtsür lilar memetetka, ta NSF lenirtemisa ashi.
Iba dak sendakba maparen nung NSF telokisa Manipur Chief minister dangi züluba shidi ka nung NSF lenirtem dak tim mesüi benshiba aser mezüngmeshiba police tanishisangji mapa nungi anentsütsüla aser tanüngba police-temjia mapa nungi agiena atatsüla ta takangba agütsüogo.
Ano, NSF telokisa Manipur sorkar dang Imphal aser temeket nung Naga nunger ajak kecha timtem melii sadema senzütettsüsa tensa junga alitsüla ta takangba ka metetdaktsü.
Item takangbatemji mataloktsüra, NSF teloki tapet mapa inyaktsü ta metetdaktsüogo.
Manipur nung Manipur police-i NSF lenirtem mezüngmeshia benshiba mapaji Dimapur Naga Students’ Union aser Diphupar Naga Students’ Union nati kanga sashia aitsür ta metetdaktsüogo. Iba dak sendakba maparen nung NSF teloki Manipur sorkar dang nungi akangba onüktem nungji nungiter ta kaketshir telongjem telok anaprongla tenüng nung Dimapur Naga Students’ Union tir Wb. Süngkum Aier aser Diphupar Naga Students’ Union tir Wb. Sakulemba Jamir nati külem sangdong ka nung metetdaktsüogo.
Iba kasa tatalokba dak sendakba maparen nung Lotha Students’ Union-ia Manipur police aitsüba osang ka metetdaktsüogo.