NSF-i Md. Inzamul Hoque Talukdar magizüker

Dimapur, October 3 (TYO) : Kaketshir Md. Inzamul Hoque Talukdar-i Nagaland state reserved seat nung MBBS/BDS azüngtsü memelaba anema Gauhati High Court nung ken o benokba atema Naga Students’ Federation (NSF) mepelar, ta sangdong ka nung metetdaktsü.

NSF tenzükba nungi Naga nunger kaketshirtem yaritsü aser temeten atema inyaka arur aser iba nung ajemdaker September 21, 2015 nü NSF-i Inzamul Hoque Talukdar aser par tsüraburtem jaok, saka iba mapang par kinüngertem dang aru, ta sangdong nungsa shia lir.

Par kinüngertemi Inzamul aser par tsüraburtem marutetba atema kuli agütsü aser idangji NSF-i parnok dang okadaki kechi obendang agütsüdir agüjaka, telok mesüra kija shinga nema onok seat merakzükdaktsütsü ta nenshia metetdaktsü, ta Secretary Education, NSF, Imtiyapang-i sangdong nung shia lir.

NSF-i Md. Inzamul Hoque Talukdar’er kinüngertem dang Nagaland nung alirtemi aginüba ama aser putepa liyonga aotsü atema okadak nungi ken o meyipa agitsü mepishi saka parnoki ibaji meinyak, ta paisa shisem.

Gauhati High Court nung Md. Inzamul Hoque Talukdar-i kaketshir 44 aser Department of Higher Technical Education, Government of Nagaland anema ken o benokba atema okadaki ken o benoker metentsüogo ta angazüker, saka NSF-i Nagaland indang menden ka danga non-Naga indigenous nisung ka nem kodanga magütsütsü, ta nenshia metetdaktsür.

Anosa, nisung kari Md. Inzamul Hoque Talukdar anioktsü atema additional seats kar lemzüktsütsü atema mapa inyaker ta angazükogo. Iba ya shitak süra, item additional seats ji waiting list nung aliba Naga nunger kaketshirtem nem agütsütsü atema NSF-i inyaktsü, ta Secretary Education, NSF-isa metetdaktsü.