NSF-i Naga nunger loktiliba asoshi inyaktsüla: Z Lohe

Kohima, October 29 (TYO) : Honibarnü Kohima nung aliba Naga Club Building nung Naga Students’ Federation (NSF) 69 buba foundation day amung.
Iba sentong nung taoba NSF tir aser social activist, Z Lohe-i o jembidang, Naga nunger loktiliba nung wara tamajung pezü asoshi NSF-i temulung agüja inyaktsüla ta ayongzük.
Item onük pezüji shisaliok, election, ochimashi aser Naga nüjiso tem lir. Item onük pezü ya nisung ajaki süoki ia bilemtsüla aser mapa inyaktsüla, ta paisa ashi.
“NSF ya kaketshir tentet ka lir, anungji nenok atema mezüngbuba teinyaktsüji kaketshirtem atema asütsüla. Nenoki taküm March ita sangdong ka nung ‘Nagaland nung education system’ mejungi kümogo ta metetdaktsüogo aser ibaji shitak lir” ta Z. Lohe-isa ashi.
Nagaland nung education system kanga mejungi kümogo aser temeimtsü tia ka nung lir. Iba asoshi asenoki tebilemtsü abentsüla. NSF-i aitsüba aser sangdong agütsüba jagidangbo meperir saka inyakyim metongshitsü atema rongshitsüla, ta paisa shisem.
“Asen state nung college student election agiba nungi municipal aser assembly election tashi nung inyakyim meshitak aika lir. Meimchirtemi aakmesen, tetsübu aser tenokdangba hau ta melii inyaksangshira, pa/la ji joko meimchir masü. Anungji, Election dak sendakba maparen metongshitsü atema NSF-i mapa inyaktsüla,” ta paisa shisem.
Ochimashiba ya onük tulu ka lir aser iba ya nisungtem taküm libaliro yimya ka ama dang kümogo. Naga nungeri ozüngtem kübok manidaker, aser ochimashi anema ola adokertemji teimla makartem ama züngshir.
Nagaland nung telungpur telok tentetba ya industry ka ama kümogo aser sen melamela angutsü atema iba ya lenmang tajung ka lir. Iba jagi nisungtem mashileni anisar aser tangatetba tai sayur, ta Z. Lohe-isa ashi.
Item onüktem atema NSF-i süoki ia bilemtsüla aser lanu putu dang ‘tamajung dang tamajung’ ta ajatsü tesayuba tajung agütsütsüla, ta paisa ayongzük.
Sentong nungsa taoba NSF president, Zaky Tsükrü-ia tajungshi o tatsüka jembidang, Naga nung loktiliba ajungkettsü atema aser ajangzüktsü atema NSF-i mapa inyaktsü ashi.
NSF-i yimtenren telok mesüra kin dak merangloki aser pei ajungtsü atema dang mebilemi Naga nunger ajak atema bilema inyaktsüla, ta Zaky Tsükrü-isa ayongzük.
Sentong nungsa NSF tir, Subenthang Kithan-i NSF tenzükertem aser tesüiba mapang inyakertem ajak nem tetushi agütsü aser parnoki mangdang tulu yua aser tarutsü atema bilema iba telok tentetba atema pelaba metetdaktsü.
Sentong nung mendenji taoba tongti tezülur Neizokhotuo Belho liasü, Police Baptist Church, New Reserve, Kohima, Youth Director, Kechyesin Keppen-i temoatsü meshia sarasadem aser asür kaketshir lennirtem bilemteta minute ka ola madoki parnok nem tetushi agütsü.