NSF-i Naga toppers tushi; Tuluni benjung den denjitepba atema tatok meshi

Kohima, July 8 (TYO): Honibarnü Naga Students’ Federation (NSF)-i HSLC 2017 nung Naga nunger toppers 29 nem tenüngsang agütsüba sentong ayonga agi.
Kohima nung aliba de Oriental Grand nung agiba sentong nung o jembitsü jaokerji PHED Chief Engineer, Kevisekho Kruse liasü.
“Naga nunger loktiliba renloka aoer aser asen lokti yangertsü atema technocrats, scientists aser professionals nüngdaker. Anungji, Naga nunger tematiba jenjang angurtemi ibaji tongtettsü” ta tanü Kruse-i kaketshirtem dang ashi.
Temetetertem adoktsüba, mapa angutsüba, ozüng akhümtsübur akümtsübaji shisaliok agidangbo meperir. Nisung ka taküm nung tongtipang teinyaktsütem lir aser itemji, Tsüngrem den tesentaktep ayutsüba, yimyatsüya tajung benshiba, asüngteta aliba, tangari temulung lemtettsüsa aliba, mulungsoba aser ochi jembitsü tasü aitbatem lir, ta paisa ashi.
“Kaket shisatsü aser shia metetba liaka, tang ni ashibatem melira, takümji amajok dang asütsü” ta Kruse-isa metetdaktsü.
Paisa, kaketshirtem dang tanüla tsütsü tashi aittsü atema ashidang, “asen taküm nung tanüla tsütsü anünga lira, asen taküm nung tezüdangtsü ajurutsü aser tazüngla ama dang asü. Asenoki takoktem anguyonga, tanüla tsütsü tashi meiti lira, takümji amajok dang asütsü” ta ayongzük.
“Naga nunger melenshidar aser asenok atema anogo tajungtem arudar. Asenok dangi yimjung aser mapatem arutsü. Nür kibong, yim, kin, linük aser alimai nenok aginür. Alimai nenok dang nungi tulu imlar aser nenoki langkaka inyaktsü atar” ta paisa kaketshirtem dang ashi.
Kruse-i NSF ketdangpurtem nem tenüngsang agüja jembidang, “ketdangpurtem tasentemi Naga nunger atema mapa tajung aser temelenshi aika bener arutsü imlar,” ta ashi.
“NSF tenzükba nungi Naga nunger atema tongti shilem agia arur aser maneni Naga nunger loktiliba atema NSF-i mapa tajung inyaktsü imlar. Talisa nenoki kaketshirtem dak sendakba onüktem atema inyaktsüla” ta paisa shisem.
Kesosul Christopher Ltu-i NSF tir o jembidang, kaketshirtem nem tenüngsang agütsü.
“Nenoki merangba, bendanga agütsüba aser aremzükba ajanga iba jenjang tongtetogo aser nenoki iba dang nungi takok tuluba angutsü” ta Ltu-i shisem.
Naga kaketshirtem tushiba sentong den Sumi nunger Tuluni benjungmung denjitepba atema Ltu-i, “iba ya asa-a atongba masü.” ta metetdaktsü.
Sentong nung mendenji NSF tatong tir, Boveio Poukai Duo liasü aser CBCK Associate Pastor, Chikhungo Puro-i temoatsü meshia sarasadem.