NSF-i Nagaland sorkar dang pelar

Dimapur, December 11 (TYO): Nagaland sorkari Inner line telongtet nung Dimapur district ajunga dendaktsüba pelashishia agizüker, ta Naga Students Federation (NSF)-i metetdaktsü.
Nagaland state ajunga nung ILP maparen inyaktsü atema NSF-i mapang talangka nungi khangyonga aru. Ozüng alema arurtem dang nungi asen sobaliba takar, inyaksangshi aser maparen kümzüka ayutsü atema onoki iba takhangba agütsür, ta NSF Tir Ninoto aser Asst. General Secretary Siipuni NF Philo nati ashi.
Chief Minister Eno. Neiphiu Rio aser Deputy Chief Minister Eno. Y Patton nati anir state sorkari iba telemtetba tajung agiba atema pelar. Iba ajanga Nagaland nung lisopurtem temeten kümzüka ayutsü, ta NSF ketdangpurtemi ashi.
Tesüiba mapang lennirtemi kanga dang mangdang tulu yur iba atema mapa inyakba aser ano parnok aikati tanü tashi onok den külemi yaritepa aruba atema tenüngsang agütsür, ta Ninoto aser Siipuni natisa metetdaktsü.
State sorkari ILP ozüng ya asangsang nung mapa küma inyaktsü atema inyakyim tajung latettsüla aser iba nung NSF-i akokba tashi yariteptsü renema lir, ta tenatisa ashi.