NSF-i New Delhi nung Naga yimten latettsü takhangba agütsü

September 25, 2019 nü linük yimtiba kübok Jantar Mantar tesem nung Naga Students’ Federation (NSF)-i ayongzükba sentong nung shilem agirtem kar angur. 

New Delhi, September 25: Bodbarnü Naga Student Federation (NSF)-i New Delhi nung Naga yimten latettsü atema takhangba agüja sentong ka agiogo.
NSF-i Mandi House nungi Parliament Street tashi rally ka ayonga agi. Parnoki Centre sorkar dang NSCN-IM den framework agreement agiba onüktem nung ajemdaker Naga yimten latettsü atema takhangba agütsür.
Iba sentong ya NSF-i Naga Student Union, Delhi den yaritepa ayongzük,
“Naga yimten ken o mapang talangka jembia arur, anungji onoki yimten latettsü atema takhangba agütsür. GOI aser NSCN-IM tsüngda framework agreement nung sign asüba nung ajemdaker yimten latettsüla” ta tanü kaketshir kati ashi.
“India sorkari framework agreement nung sign asüba ajanga Naga nunger taginüba angatetogo ta onoki imlar” ta kaketshirisa ashi.
PM dang onük 3 akhanger
Tanü NSF-i Prime Minister Narendra Modi nem tezüluba ka nung takhangba onük asem agütsüogo.
NSF-i PM Modi dang Naga nunger putiotsü balaka ta asüba tangatetba nung ajemdaker yimten latettsü atema ayongzük.
“Alemli nungi Naga yimtsüng shiai pei sasa dang ketdangsüa liyonga aru. Naga nunger litsü madak chuba mesüra tashi aketer shingaia yimsü mesüdang aser 1885 matongdang British nungeri Assam atsünga agiba sülen, Naga hills nung teka maitsü ta asüba tangatetba nung dang liasü,” ta NSF-i Modi dangi züluba shidi nung shia lir.
January 10, 1929 nü Naga nunger tenüng nung Naga Club-i Simon Commission dang Naga nungertem India kübok shilem ka asütsü memulunger ta tezüluba nung agütsü. August 14, 1947 nü Naga National Council (NNC) kübok Naga nungeri nüjiso anguba sangdong aser May 16, 1951 nü Naga National Plebiscite agidang Naga nunger 99.9% ajanga Naga nüjiso pusema nungita liasü, ta NSF-isa metetdaktsü.
Nagalim ya Indian Union nung tashiyim agi dendaktsü. Tanga chuba yimlitemi Indian Union nung adentsü mulungba ama masü saka Naga lennirtemibo India nung madentsü tekong merang. Parnoki kodang instrument of Accession nung sign masü mesüra India Independence Act 1947 pusema menungit, ta NSF-isa shidi nung shia lir.
“Iba ya Naga nunger putiotsü balaka ta asübaji lir aser India sorkaria agizükogo, anungji Naga lanurtem aser kaketshirtemi nü dang tekaratiba nung Naga yimten latettsü atema ayongzüker” ta NSF-i Modi dang ashi.
“Naga nungertem linük balala nung aser ano India linük kübok state balala nung lemsaa lir, saka Naga yimten latetba nung Naga nunger ajak adentsüla. Anungji, India aser Burma nung aliba Naga nunger medeni yimten latetra, ibaji onoki magizüktsü. Naga yimten tebilemtsü ka ka dang asü nung, sendaka alirtem ajak dennür, telemtetba ka dang agitsüla” ta NSF-i metetdaktsü.
Parnokisa PM Modi dang Naga nunger ajaki agizüktsüsa yimten latettsü atema nenshia metetdaktsü.
Taoba mapang Nine Point Agreement, Sixteen Point Agreement aser Shillong Accord tenangzükbatem agiogo saka item ajanga Naga nunger aginüba yimjung bener marutsü. Anungji, tanü Centre sorkar dang taoba tenangzükbatem ajanga tamakok angubatem angatettsü mepishir. Naga nunger lanur aser kaketshirtemi India sorkar dang ajaki agizüktettsüa yimten latettsü aser yimjung bener arutsü mepishir, ta NSF Tir Ninoto Awomi aser Tongti Tezülur Liremo R Kikon nati sign asüba shidi nung shia lir.