NSF-i plastic mamshitsü aser süngdong atemtsü ayongzüktsü

Kohima, September 13 (TYO): India nung ‘single use plastics’ noktangba pusema, ‘plastic free’ tangatetba nung Naga Students’ Federation (NSF) Martyrs’ Memorial Trophy asayatsü aser iba asayamung nung ‘plant for life’ omen nung ajemdaker süngdongtem lema agütsütsü.
State yimtiba nung kaketshirtemi ayongzükba asayamung tulu rongnung NSF Martyrs’ Memorial Trophy ya ka lir aser küm shia Angami Students’ Union (ASU)-i ayongzüker.
20 buba asayamung ya September 21 nungi October 19 tashi Kohima local ground nung amongtsü.
State aser Centre sorkartemi ‘single use plastics’ noktangtsü atema mapa inyakba pusema ASU ketdangpurtemi Martyrs’ Memorial Trophy indang working committee den külemi asayartem o tereprangertem dang plastics mamshitsü ayongzüktsü lemtetogo.
Ita piyong asayatsü aliba asayamung nung mineral water dena plastics kecha mamshitsü atema ayongzüktsü, ta tanü osangbener den jembidang ASU president Vizokho Zashümo-i metetdaktsü.
“Onoki tenokdangba magütsütettsü saka asayadak plastics mamshits atema ayongzüktsü akok. Plastic indang tzü tajemtsü pongdang-a mamshitsü aser pei pei indang tzü pongdang bener arung ta ayongzüktsü” ta ASU president-isa shisem.
Iba atema Kohima Municipal Council aser Kohima Smart City Development Limited-i local ground meketa water dispensers 15-20 shi ka yutsütsü. Dispensers anasa paper cups dena yutsütsü, ta paisa ashi.
Taküm asayamung nung ‘Plant for Life’ omem kübok tetushi süa jaokertem nem süngdong agütsütsü. Taoba mapang mementos agütsü saka takümbo süngdong agütsütsü aser ibaji District Forest Officer, Kohima ajanga Department of Forest-i agütsütsü, ta Zashümo-isa metetdaktsü.
March 20, 1986 nü Alichen nungi Nagaland Armed Police-i Kohima yimtsüng nungi asür Kekuojalie Sachü aser Kigwema yimtsüng nungi asür Vikhozo Yhoshü na khaset aser tena nem tetushi agüja kümshia iba asayamung ayongzüker.
Asayamung nung mezüng takok angur nem sen lakh 2 den takok marok aser kulikaket aser tanabuba nem sen lakh 1.20 den takok marok aser kulikaket agütsütsü.
Semi final nung tamakok angur nem Rs. 30,000 aser quarter finalist atonger nem Rs. 15,000 agütsü, ta tournament working committee züngsem Zakie Khate-i ashi.
Maneni, Best Defender, Best Goal Keeper, Best Midfielder aser Highest Scorer shia nem Rs 10,000 agütsütsü aser Player of the Tournament nem motorbike ka agütsütsü, ta Khate-isa shisem.