NSF-i Staff Selection Board atema lungkak aiter

Kohima, March 18 (TYO): Naga Students’ Federation (NSF)-i staff selection board dak sendakba nung sorkar nem onük pezü takhangba agütsüba atema Bodbar nungi parnoki lungkak aitba tanabuba shilem tenzükogo.
Corona virus wara prokshiba aser nisung lokti mesenteptsü tenokdangba agüja aliba agi NSF-i kaketshirtemi adenshi lungkak aitba melena banners aser posters campaigns ka tenzükogo.
NSF president Ninoto P Awomi-i osangbener dang ashiba agi, district ajak nung federating units-i iba mapa inyakogo.
Sorkar dang onük pezü akhangba agizüka mapa akümtsü aser Nagaland Staff Selection Board (NSSB) mapa küma tenzüktsü atema banners aser posters nung zülua lir.
NSF-isa state sorkar dang departmental exams magitsü aser Group C posts nung direct recruitment asüba amentsü atema takhangba agütsür.
“February 22, 2020 nü onoki sorkar nem anogo 15 züngzüktsü aser ibaji March 7 nü tembanga liasü. Ajisüaka, onoki hopta ka tema ataka, sorkar nungi telangzüba kecha mangu, anungji iba jagi lungkak aittsüsa akümer” ta Awomi-i ashi.
Tang lungkak aitba ya mapang kobika agitsü ta osangbener asüngdangdang “mapang telatet mali saka sorkari yamai dang süra, onoki state ajungalen lungkak aitba shilem tasembuba tenzüktsü aser ibaji tesashiba asütsü” ta NSF tiri langzü.
Chief Minister Neiphiu Rio lenisüba kübok sorkari tarutsü Naga nunger tazüngertem kümzüka ayutsü atema mapa inyaktsü imlar, ta Awomi-isa metetdaktsü.