NSF-i takhangba agütsüba nungi masetshir

Dimapur, Tsüklai 23 (TYO): Director, School Education-i text books aser study materials mapang shitak nung magütsütetba kuli agütsüba atema kanga aoksar ta Naga Students’ Federation (NSF)-i metetdaktsüogo.
Department-i mapang shitak nung parnok teinyaktsü inyak asübo State Assembly election nung amshitsü atema garitem yokba indang tatemtsü melila. Iba jagi parnoki tamakok anguba ang sayur, kechiyong school lapoker ita ka shi aruaka kaketshirtem ket nung text books aser study materials mali, ta NSF mendenpurtemi sangdong ka nung ashi.
2018 küm tetenzüklen Nagaland state nung election agitsü ta Department-i meteta liasü aser talisa Tsüklai ita nungi academic session tenzüker. Anungji, parnoki ashiba ama text books Dimapur tonger süra, parnoki mapang shitak nung text books aser study materials lemer alitsüba asü, ta parnokisa ashi.
Tekaratiba nung kaketshirtem nem text books aser study materials agütsütsüla ta akhangba nungi NSF-i masetshii noktaker aser iba ama meinyakra, NSF-i kecha menungnangi Directorate of School Education shibangtsütsü, ta mendenpurtemisa metetdaktsüogo.
NSF-isa Department of School Education aser Sarva Shiksha Abhiyan (SSA) dang school uniform atema Ministry of Human Resource Development (MHRD) aser State sorkar den tongtepa inyaktsü mepishir ta sangdong nungsa shia lir.