NSF-i tasürtem bilemteta 32 buba Martyrs Day amung

Kohima, Metsüremi (March) 20 (TYO): Küm 32 tejakdang taküm bendanga agütsür kaketshir ana bilemteta tanü Naga Students’ Federation (NSF)-i Martyrs Day mungogo.
IPS cadre tenzükba aser Nagaland nung Disturbed Area Belt kilometer 5 nungi 20 ulushiba anema 1986 küm Metsüremi (March) 20 nü NSF-i lungkak aitba sentong ka agidang Nagaland police-i kaketshir ana khaset aser iba sülen nungi kümshia iba anogo ya NSF Martyrs Day ta ser mungyonga arur.
Lungkak aitba sentong nung Government Higher Secondary School, Seikhazou nungi kaketshir asür Kekuojalie Sachü aser Mezhür Higher Secondary School nungi kaketshir asür Vikhozo Yhoshü na police-i khaset.
“Onoki tasür ana nem tetushi agütsür” ta NSF tir, Kesosül Christopher Ltu-i sentong nung jembidang ashi.
“Asenoki tasürtem atema sarasademtsüdi aser taküm alirtem asoshi raradi” ta paisa lungpak nung zülua aliba olen ajanga tesentepertem ayongzük.
Iba sentong nung mendenji NSF Information and Publicity Secretary, Shilukaba Longchar liasü aser Immanuel Baptist Church pastor Zakiebeituo Metha-i temoatsü meshia sarasadem.
Sentong nung NSF lennirtem, tasür ana indang kinungertem aser student union balala nungi züngsemtem aden.