NSF-i tatok meshitsüla: SKK

Dimapur, July 8 (TYO): Sumi Kiphimi Kuqhakulu (SKK)-i shidi ka ajanga NSF tir den Naga Students’ Federation (NSF)-i Sumi nunger temulung yirutsüba indang osang metetdaktsü.
“July 8, 2017 nü Sumi nunger Tuluni benjung nung NSF-i Naga toppers nem tenüngsang agütsüba sentong agitsü atongba ajanga Sumi nunger temulung yirutsüogo, ta July 7, 2017 nü onoki nenok dang shidi ka nung metetdaktsü, saka nenoki kasa anogo nung iba sentong ya taoba mapang anogo shima ayuba liasü aser sentong athitsü makok ta telangzüba shidi ka agütsüba atema onok mepelar,” ta SKK mendenpurtemi tanü NSF dang ashi.
NSF-i iba sentong athitsübaji tamakoktsü ta ashiba ajanga Sumi nunger temulung yirutsüogo aser talisa, iba ya NSF temzüng alema lir, ta SKK-isa ashi.
Iba inyakyim ya NSF-i asa-a Sumi nunger kaketshir teloktem dang masü saka Sumi nunger ajak mezüngokba aser mezüngmeshiba ka lir. Joko iba onük ya kin indang onük ka ama kümogo aser iba jagi SKK-i takhangba agütsütsüsa akümer., ta parnokisa sangdong nung metetdaktsü.
NSF-i Sumi nunger temulung yirutsüba atema osangkaket ajak nung Sumi nunger dang tatok meshitsüla aser iba nungji ajemdaker, July 12, 2017 nü SKK rongdak senden ka nung telemtetba ka agitsü, ta SKK-i takhangba agütsü.
Ano, tanü VK Range Students Union-ia sangdong ka nung NSF aitsüba metetdaktsüogo.
Parnokisa, Naga nunger telok balalai kin ajak indang maitsü aser sobaliba akhümtsübuteptsü atema tayongzükba agütsü aser iba onük asoshi All Sumi Students Union(SKK)-i lemtetba pusema nungiter, ta metetdaktsü.
NSF ketdanpurtemi tebilemba tamajung nung mapa inyakba magizüker. Anungji, tang teinyakdak NSF ketdangpurtemi pei menden toktsütsüla, ta VK RSU-isa sangdong nung metetdaktsü.