NSF-i ULBs nung Non Naga nunger meshimoktsü ayongzüker

Dimapur, July 29, 2024 (TYO): Naga Students’ Federation (NSF)-i Chief Minister Neiphiu Rio dang Urban Local Bodies (ULBs) nung Non Naga nunger meshimoktsü atema shidi ka züluogo.

ULBs amala sabangtem ajanga sensotem atema lemtet balala agia inyaksangshir anungji Non Naga nunger sorkari shimtetba nübo ama meshimoktsüla ta NSF-i ashi. ULBs nung shimokertemji lisopurtem den sendaktepa alirtem dang asütsüla.

Lisopurtemi shilem agibaji Naga nunger maitsü, sobaliba aser putiotsü kümzüka ayutsü atema lir ta NSF-i CM Rio dangi züluba shidi nung shia lir. ULBs ya Nagaland state nung lisopur Naga nungertem atema dang asütsüla aser local governance nung Naga nungeri dang lemtettem agitsüla. ULBs nung reserved categories nung Non-Naga nunger aniokba ajanga Naga nunger shimoka aliba menentsür, ta NSF-isa ashi.

Lisopur maitsü ya ali, sobalioba aser pei sasa ketdangsüba den sendaktepa lir. Naga nunger maitsü, sobaliba aser ketdangsübaren wazüka ayutsüla, ta parnokisa CM Rio dang ashi. “Lisopur menden nung nonindigenous nisungtem mendaktsübaji asen putiotsü aser loktiliba wazüka ayuba nung lendong bentsür arutsü. Naga nunger ketdangsübaren ajanga asen maitsü jangjatsür aser lisopur Naga nunger nüngdak aser taginübatem atema inyaker” ta NSF-isa ashi.

“Nai democratic inyakyim aser Nagaland nung lisopurtem kümzüka ayutsü nangzükba ama inyaktsü temulung alemer. Iba ken o atema nai telangzüba tajung agütsütsü aser teinyaktsü tim inyaktsü amanger” ta NSF-i CM Rio dang ashi.

“NSF-i Nagaland state nung aliba lisopur Naga nunger temeten atema onoki jembir saka kasa mapang nisung ajak adentsüba aser kasa maongka angutsü tangatetba onoki pusemer. Ajisüaka nisung ajak adenba tenüng nung Naga nunger temetentem magiendaktsütsü. Nisung ajak külemi tejakleni aotsü saka lisopurtem temeten kümzüka ayutsüla” ta President Medovi Rhi aser Asst. General Secretary Kenilo Kent nati shidi nung shia lir.