NSF Martyrs trophy nung asayar telok 63 asayatsü

Kohima, Sep 13 (TYO) : Nagaland nung nüngtugu asayamong aser ajaki yongyaseta aliba 16 buba NSF Martyrs’ Memorial Trophy Kohima nung September 16, 2015 anogo nungi tenzüka asayatsü anogo latetogo
Iba asayamong sentong ya küm shia Angami Students’ Union (ASU)-i asür Kekuojalie Sachü (Kohima Village) aser asür Vikhozo Yhoshü (Kigwema Village) tena tenüng nung ayongzüka akar. Kaketshir ana ya 1986 küm March 20 nü NSF teloki state sorkar telemtetba anema longkak aitba sentong nung shilem agiba mapang Nagaland police-i khaset.
Iba anogo nung kaketshirtemi India aser Myanmar na artsülen Disturbed Area kilometer 5 dang liasüna nungi kilometer 20 tashi atsülangtsüba aser Nagaland police nung IPS anoiktsü telemtetba agibatem anema longkak aita liasü,
Taküm 2015 küm iba asayamong sentong ya September 16, 2015 nikongdang 1:00 ako nung Nagaland Road & Bridges miniter, Y Vikheho Swui lapoktsütsü.
Taküm küm iba asayamong nung asayar telok ajak agi 63 asayatsü tenüng agüja lir. Iba asayamong nung takok angur nem senpet sen lakh 1.6 aser tanabuba takok jenjang angur nem senpet sen lakh ka agütsütsü renema lir.
Item asayar telok 63 rongnung Kohima nungi 49, Phek nungi 2, Dimapur nungi 6, Peren nungi 3, Tuensang nungi 1 aser Manipur nungi 2 lir.
Iba asayamong lapokba sentong nung adentsü asoshi school aser college nung azünger kaketshirtem ajak anüngdang 12:30 ako nung asayadak tesem tonga arudaktsüner ta asayamong ayongertemi mepishia metetdaktsüogo.