NSF Trophy: MTYO Medziphema & Unity FC nati takok angu

Kohima, Rongjui/September 30 (TYO): Hombarnü 20buba ) NSF Martyrs Memorial Asayamung tanabuba round nung MTYO Medziphema aser Unity FC nati pei tata asaya kokogo. Iba asayamung ya Angami Students’ Union-i ayongzüka Kohima Local Ground nung tang asayadaki.
Tanü mezüngbuba asaya MTYO Medziphema-i amokbanger asaya aser parnoki Laimeisham FC Longleng goal 5-1 agi koka liasü.
Asaya nung MTYO Medziphema atema mezüngbuba goal Zumzum (11)-i minute 5buba nung idaktsü aser Darhü (9)-i tanabuba goal minute 14buba nung idakja liasü. Laimeisham FC Longleng pur atema tia kaa MTYO nungi asayar Khosa (12)-i minute 31buba nung par goal nung goal ka idaktsüba sülen asaya mezüngbuba shilem 2-1 nung tembang.
Ajisüaka asaya tanabuba shilem nung Darhü-i minute 46 aser 67buba nung goal ana atonga idakja hat-trick agütsü aser Zumzum-i minute 69buba nung par team asoshi goal pongububa idakja parnoki asaya ayong ayonga akok.
MTYO Medziphema nungi asayar Darhü (9) nem asayar yimya shidak mebenshiba atema minute 56buba nung yellow card ka agüja liasü.
Tanü asaya tanabuba Unity FC aser United Falcon Club Medziphema town na kanga toktepa asayaogo. Asaya goal 1-1 agütsür tembangba sülen tie breaker nung Unity FC puri goal 4-1 agi takok angu.
Asaya mezüngbuba shilem nung telok kati danga goal idaktsütsü asoshi maongka tajung monguteti tembang. Iba sülen asaya tanabuba shilem nung Unity FC pur atema Olando (6)-i minute 65buba nung goal ka idaktsü saka Inato Ayemi (24)-i minute 82buba nung United Falcon Club Medziphema Town pur atema goal ka idakja goal kasasa nung asaya tembang.
Tie-breaker asaya nung Unity FC puri goal pezü atonga idaktsü saka United Falcon puri ka dang idaktsü.
Unity FC nungi asayar Kenan (13), Khrukhotuo(3) aser Khriesamhalie(14) aser United Falcon Club Medziphema Town nungi asayar Botovi Yepthomi (9) nunger nem yellow card kaka agüja liasü.
October 1 nü asaya yamai alitsü:
DEF Kohima vs Jotsoma Youth Organisation @ 12:30 pm
Centurion FC Vs Zodic FC @ 2:30 pm