NSG plenary senden nung India züngsem atema magizük

Bern/New Delhi June 24 (Agencies): Switzerland yimtiba, Bern nung Nuclear Suppliers Group (NSG Plenary senden nung India züngsem akümtsü atema telemtetba magitet, ajisüaka taküm November ita nung NPT tezüngzüktep magiba linüktem iba telok nung züngsem akümtsü onük nung o lemteptsü.
NSG nung tongtibang züngsem rongnung ka, China-i, India-i Nuclear Non-Proliferation Treaty (NPT) tezüngzüktep agia mali, anungji iba telok nung adentsü makok ta shia nokdangba ajanga India-i tetsükdaktsü ajurua arur.
Anogo ananü amenba sülen tanü NSG-i sangdong ka ajanga, “NPT tezüngzüktep agia maliba linüktem iba telok nung züngoktsü atema NSG-i ‘Technical, Legal aser yimtenren’ tsütsülen nungi asadanga o lemtetogo,” ta metetdaktsü.
“Iba teloki maneni iba onük nung o lemteptsü atema taküm November ita nung senden ka ayonga amentsü lemtetogo,” ta sangdong nungsa shia lir.
“Plenary senden nung NSG-i 2008 küm India den civil nuclear cooperation indang sangdonga aliba tip ajaklen nungi asadanga jembi, aser India den NSG tesendaktep indang jembi,” ta NSG-isa metetdaktsü.