NSLSA-i matamabensartem atema legal service tenzüktsü

Sept. 20, 2016 nü GHC, Kohima nung Justice, Nishitendu Chaudhury aser NSLSA ketdangsertemi teyari angurtem den tangokba noksa ka angur.

Kohima, September 20 (TYO): Nagaland State Legal Service Authority (NSLSA)-i Mongulbarnü Gauhati High Court, Kohima bench nung matamabensartem atema legal service tenzükogo.
Legal service teyari agir 22 rongnung tambusangji arishi küm 70 tain aser tanubosangji arishi küm 6 tebur ka lir.
Vote atema dang matamabensartem tenüng züngokbaji mezüngmeshiba inyakyim ka lir, ta tanü Chief Justice & NSLSA Executive Chairman, Justice Nishitendu Chaudhury-i ashi.
“Ajok amer jajartem asoshi aochia bilemtsüba agidangbo meperir, anungji law students, social aser political activist temi matamabensartem bushitsüla aser parnoki facility angutsü atema yariteptsüla” ta Chaudhury-i ayongzük.
“National Legal Service Authority-i scheme tasen 7 tenzükogo aser item rongnung kaji shi aser tekolok agi tangar memenepertem asoshi lir. India kübok state kar nung iba scheme tenzükba rongnung Nagaland state densema lir aser North East state rongnungbo Nagaland mezüngbuba lir,” ta paisa ashi.
Dimapur nung service centre ka lapokba ajanga matamabensartem tajangzük kanga angutsü kechiyong ibaji lapok nungbo parnok teyari angutsü atema tangaleni aotsü nüngdak madoktsü, ta Chaudhury-isa shisem.
Sentong nung Commissioner aser Secretary Department of Justice & Law, M. Patton-i ashiba agi, “2011 census nung ashiba agi Nagaland nung disabled persons 29,631 lir saka parnok rongnung shilem 5 shi ka dang disability certificate lir, iba ya ajanga inyakyim nung langka aibelena lir ta kuli sayur.”
Dimapur, Mon aser Tuensang nung district disabilities centre asem tashi lapoktsüba sentong liasü saka Dimapur nungdang lapok saka ibajia mapa meinyaker, ta Patton-isa sasa bilemba olen ka ashi.
NSLSA Member Secretary, Nino Iralu-i disabled persons dang NSLSA den tongtepratepa angati teyari agitsü atema metetdaktsü.
Kohima nung Bhagwan Mahaveer Viklang Sayahata Samiti nungi technical team ka arua lir aser parnoki handicapped persons yarir. Samiti-isa ‘artificial limbs’ angati agütsür aser parnok indang free artificial limb calipers fitment centre ji Guwahati nung lir.