NSLSA-i senden ka ayonga amen

Kohima, Rongchii (April) 14 (TYO): Nagaland State Legal Services Authority (NSLSA)-i Küptoknü (Honibar) Kohima nung Master Trainers, Trainers, Retainer Lawyers aser State Panel Lawyers indang senden ka ayonga amen.
Iba sentong lapokja jembidang Director General of Police, Rupin Sharma-i “nübortemi parnok indang temeten lir ta bilemer aser iba atema ozüng amertemi osang tejangja metetdaktsütsüla” ta ashi.
Ozüngtem lateta aliba kübok loktiliba aotsü atema ozüng amertem aser mongintemi osang tejangja metetdaktsütsü tim. Ozüngji tesem shia balala angateta benshir aser iba amaji nübortem tsüngda mangatetteptemjia adoker. Nagaland nung kin mesüra telok 25 dak tema lir aser iba ama loktiliba ka nung legal services authority-i tongtipang shilem agitsüla, ta Rupin-isa ashi.
Ozüng shitak metetba ajanga nisung kati tim lenmang nung jajar aser mapa tamajung meinyaktsü noktangba den külemi mapatem timi inyaksangshitsü tangatetba agütsür. Iba asenoki ozüngtem timi benteta benshitsü nüngdak, ta paisa shisem.
Nagaland nung ozüng amertemi nisungtem tim lenmang nung jajadaktsütsü atema mapa inyaktsüla. Nübortemi sobaliba ozüngtem aser inyakyimtem balala angazüka alitsü akok saka asenoki tanü alima nung benshiba ozüngtem jangjajangja prokshitsüla, ta Nagaland DGP-isa ashi.
Tila asüdang nungi ozüng meteta aintsü atema Nagaland nung school aser college tem nung basic legal education sayutsüla aser sobaliba ozüngtem timi bentettsüla, ta Rupin-isa ayongzük.
Nagaland nung legal services maparen tajungba nung inyaka aotsü atema tebilembatem lemsateptsü aser shisatsü bendentsü atema iba senden ya amener, ta NSLSA Member Secretary, Mezivolu T. Therieh-ia ashi.
National Legal Services Authority-i osang prokshiba nungi tashi itdaktsüba nung rangloker mapa inyaktsü. Iba nung ajemdaker NSLSA Legal Services Camps ayonga agitsü atema sentong ka renemogo, ta Mezivolu-isa ashi.
School nunga Legal Literacy Club tem lapoktsü atema mapa tenzükogo aser iba ya küm piyong inyakba mapa ka asütsü, ta laisa shisem.
Iba senden nung mendenji Programme coordinator Neiteo Koza liasü, Kohima Baptist Pastors’ Fellowship president Rev Dr. Vevo Phesao-i o tatsüka jembiba den temoatsü meshia sarasadem aser NSLSA State Coordinator Akumla Longchari-i anküp tepela o jembi.