Nsong jila nung Health Mela ayongzüka agi

Dimapur, Tsüklai/February 25 (TYO): Beti Bachao Beti Padhao (BBBP) kübok Tening Block Task Force-i achaayanga Nsong jila nung February 24 nü Health Mela ka ayongzüka agiogo. Iba sentong ya Extra Assistant Commissioner (EAC) Tumben P. Tsanglao-i anir agi.
Tsanglao, shiba EAC Nsong incharge lir pai, Village Health Committee ajanga tekübokba jenjang nungi nüburtem temang anepalubaren takok nung inyakyonga aotsü asoshi training agütsü.
Medical Officer (MO), Dr. Neilasakuo Linyu aser Ayush of Community Health Centre (CHC), Tening MO Dr. Nuksang Jamir nati temang anema alitsü koda tongtibang iba indang jembia liasü. Dr. Neilasakuo Linyu, shibai iba mela tenzükja liasü, pai nüburtem dang health worker tem indang service tem agitsü asoshi ajungshi.
Village Education Committee (VEC) orientation session nung aiür chanutem aser tetsürtem nem tashi agüja parnok ajungkettsü asoshi koda tongtibang iba indang metetdaktsü. Paisa, VEC dang school aser health care kanga junga meita alitsü mepeshi.
Bamsiakilwa, Lalong, Nchen, Ngaulong aser Nsong nungi Village Health Committee tem BBBP kübok iba orientation sentong nung aden. Health counseling aser temang anepaluba den mozü lemtsüba ajak sentong nung shilem ka laisü. CHC Tening, ICTC counsellor Lungkuheing Ndang-i HIV/AIDS dak sendakba nung counseling agüja liasü.