NSRLM-i Antyodaya Diwas benjong among

Dimapur, September 25 (TYO): Rural Development Department kübok Nagaland State Rural Livelihoods Mission (NSRLM)-i tanü Antyodaya Diwas mongogo.
Iba sentongji Niathu Resort, 7th Mile, Dimapur nung agi aser Rural Development Minister Metsubu Jamir-i tetushi tejaoker ka ama shilem agi.
Taküm indang Antyodaya Diwas omenji “be skilled, be employed” liasü.
Tanü agiba sentong nung PIAs balala nungi trainees aser faculties den department balala nungi sorkar ketdangsertem aden.
Minister Metsubu Jamir-i o jembidang, lanurtemi pei sasa inyaka taküm liyonga aotsü mulungtetba atema tenüngsang agütsü.
Tsüraburtemi pei chirnurtem dang pei sasa züsena taküm alitsü indang tesayuba agüja ayongzükba atema pelar, ta paisa shisem.
Paisa PIA balala nungi trainees dang lokti nung tangar ajungmesor ka ka asütsü ayongzük. “Nenoki skill mapa tajungba inyaktsü merangang aser tangaria nenok jilu benshitsüsa inyaka sayuang. Alima nung takartiba nisungtemji pei sasa züsentetertem aser tila nungi tenzükertem lir” ta Minister Metsubu-isa ayongzük.
Sentong nung Additional Secretary, RD & Mission Director, NSRLM, Athel O Lotha-i okila jembidang “iba benjong ya NSRLM atema tongtipang anogo ka lir kechiyong DDUGKY kübok training tenzükba iba ajanga sayur” ta ashi.
Taoba küm ka tsüngda lanur 722 tashi wadang balala nung training agütsü aser parnok 163 tashi linük kübok company balala nung mapa nguogo. Ano, tarutsü nunga lanur aika training agitsü imlar, ta laisa metetdaktsü.
Tanü agiba sentong nung Ministry of Rural Development nungi ketdangser ka, Anthony Chasteii aser Malcolm Fernandez nungertem o jembi.
Sentong nung mendenji Additional Mission Director, Kevipodi Sophie liasü aser Chief Operating Officer (Skills) Menuoneituo Chadi-i anküp tepela o jembi.