NSRLM-i DDU-GKY ‘Kaushal Panjee’ sentong ayonga agi

Dimapur, October 14 (TYO): October 13, 2017 nü VDB Union, Conference Hall, Wokha nung Nagaland State Rural Livelihoods Mission (NSRLM)-i DDU-GKY ‘Kaushal Panjee’ indang sensitization programme ka ayonga agi.
Sentong nung jembidang BDO, Chukitong Block, Wokha, Tsenlumi Ezung-i, Centre sorkari yimtsüngtem nung arishi küm 18-35 tsüngdapur lanurtem teka mapa balala shia meteta peisasa litettsü atema nükjidong yur inyaker, ta metetdaktsü.
Laisa, tan aliba sorkari 2022 küm tashi nungbo lanur million 500 teka mapa shia metetba ajanga alima nung Skill Capital ji India asütsü atema nükjidong yur inyaker, ta metetdaktsü.
Sentong nungsa Project officer, DRDA, Wokha Nchumthung Ngullie-i shilem agirtem dang peii jangraba mapa jangjatsüla, ta ashi.
“Taküm ya tayongzükba ka lir, aser nija kati mapa inyakteta shinga dak-a memetaloki litettsüla. Iba ya maongka ama agia pei dak aketba sempet jangjatsüla,” ta pai ashi.
SPM Skills- SMMU, Visakono Chadi-i DDU-GKY indang presentation ka agüja lanurtem dang mapa inyakba sobaliba mesamadaktsütsü atema meranga inyaktsüla, ta ashi.
Tesasaba olen ka nung Chadi-i, market nung tsümartemi mapa ajak agiadokogo; lisopurtemi asentzü sena inyakba mapatem aser business sector sendoker, ta ashi.
“Nendaka inyakba aser ochishia aliba ajanga nisung kati taküm nung nükjidong tongtettsü. Anungji shilem agirtemi sorkari agutsüba course balala agia pei tangatetba ulushitsüla, aser ita 3,6, 9 course agiba sülen item mapaji asen state nung inyaktsüla,” ta Chadi-isa ayongzük.
Trainer-Kaushal Panjee, Sentiyatet Master-i shilem agirtem nem application form lema agutsü. Iba sentong ya Assistant District Programme Manager, Samuel Kithan leniba nung agia liasü.
DEO cum Act BMMU, Wokha, Nchumbeni Ezung-i sarasadem aser Block Programme Manager, Chukitong, Nzanbemo Y. Patton-i tepela anküp o jembia liasü.