NSSA züngsemtemi sorkar ozüngtem meteta alitsüla: Chief Secy

Kohima, September 08 (TYO): Tanü Nagaland Chief Secretary, Pankaj Kumar-i State Secretariat nung inyakertem dang, nüburtem tajungtiba nung tenzüktettsü asoshi state sorkar indang tzüzüng-ozüngtem meteta alitsüla, ta ayongzükogo.
Tanü Kohima, Capital Convention Centre nung Nagaland Secretariat Service Association (NSSA) triennial conference nung tongti tesemdanger o jembidang Chief Secretary-i, “kanga kara ainba putu ka nung technology aser environment nung temelenshi lir, ajisüaka nisung ka dak aketba yimyatem- nendaka inyakba, temulung agütsüba, meranga inyakba aser mapang amshiba temjibo sorkar mapa inyakertemi memelenshitsüla,” ta ashi.
“Nüburtem tajungtiba nung tenzüktettsü aser sorkari imlaba ama inyaktettsü atema item yimya ya temulungjang nung ayutsüla,” ta paisa ayongzük.
State sorkar mapa nung tongtiretji NSSA züngsemtem lir ta shia Kumar-i parnok dang pei mapang nung tetangshi akümtsü asoshi inyaktsü aser iba den külemi nüburtem tajungtiba nung tenzüktsüla, ta ashi.
“Secretariat Services züngsemtem tejangraba nung nendaka inyakra sorkari maparen nung tamakok alutsü kuli mali,” ta pai ashi.
Kasa senden nungsa tetushi tejaoker Principal Secretary & Finance Commissioner, Temjen Toy-i, NSSA züngsemtem district balala nung inyakba sülen parnokji Secretariat den sentaka aliba senior ketdangsertem atema tongti tongshitem asütsüla, ta ashi.
Toy-isa Naga nungerji ‘tenentak, mapa nung temerang, ajak den tembar teyimnü aser ochishirtem’ ta züngshia aliba tu samaogo, ta nemjema bilemba ashi.
Anungji Naga nunger dak tajung yimyatem samabaji nokdangtsü atema NSSA züngsemtemi meranga inyaktsüla, ta paisa ayongzük.
NSSA Tir Imti Longchar-ia, tanü putu nung sorkar maparen junga aotsü atema asalendong kanga tajung, mapa tajet aser nendaka inyaktsüla, ta ashi.
IAS Association tenüng nung Finance Secretary, Kikheto Sema, Nagaland Civil Service Association Tir KS Anden Konyak aser CANSSEA Tir Takatuba Aier nungeria o tatsütsü jembia liasü.
Ketoulhou Metha-i sarasadema sentong tenzük aser Chubasangla Longkumer ketdangsüba nung iba sentong agi. Under Secretary (Finance) Lukheto aser külem inyakertem aser Tiatemsu nungeri ken aten aser Advisor NSSA H. Lungalang-i anküp tepela o jembia liasü.