NSSATA-i lungkak aitba shilem tasenbuba tenzükogo

Aami (June) 6, 2018 nü Nagaland SSA tesayurtemi Directorate of School Education Kohima kima nung lungkak aitdang agiba noksa angur. 

Kohima, Aami (June) 6 (TYO): Nagaland SSA Teachers Association (NSSATA)-i tanü nungi lungkak aitba shilem tasembuba tenzükogo.
State sorkari telangzüba magütsüba atema SSA tesayurtemi tanü nungi mener lungkak aittsü tenzük.
SSA tesayurtemi takhangba agüja Monupii (May) 3 nü mezüngbuba lungkak aitba shilem agia liasü aser iba anogo nungi parnoki class magiba ajanga sorkar school tem nung timtem ajurua arudar.
Tanü lungkak aitba tasembuba shilem nung Nagaland kübok tesem balala nungi SSA tesayur noklang aika adenshir Directorate of School Education kima nung lungkak ait.
NSSATA-i sorkar nem takhangba onük asem agütsür aser itemji taküm Aenjeti (January) ita nungi itasen magütsüi aliba agütsütsü, State sorkar mapa inyakertem den kasa 7th ROP kübok itasen agütsütsü aser non-plan budget nung SSA tesayurtem (batch of 2010 & 2013) dendaktsütsü onüktem lir.
Tanü Directorate of School Education-i ashiba agi, sorkari 7th ROP kübok itasen agütsütsü agizükogo aser Aenjeti (January) nungi Metsüremi (March) itasentem 7th RoP medeni agütsütsü.
Non-Plan nungi itasen agütsütsü atema takhangba atema Department-i ashiba agi SSA tesayurtem ya Centrally Sponsored Scheme kübok shimba lir aser SSA indang CSS ali tashi State Mission Authority SSA ajanga dang itasen agütsütsü.
Kaketshirtem asoshi aria bilema tesayurtemi mapa inyaktsü mepishir. Kechi komar ka asüyonga kaketshirtem tetsükdaktsü majurudaktsütsü aser parnok yaritsü atema mapa inyaktsü ta Department-isa metetdaktsü.
Ajisüaka, NSSATA-i parnoki akhangba onüktem magizük tashi lungkak aittsü ta nenshia metetdaktsü.